ఏపీ: కొత్త జిల్లాల ఏర్పాటు రద్దు చేయాలని హైకోర్టులో పిల్..! రేపు విచారణ

ఉగాది నుంచి ఏపీలో కొత్త జిల్లాల నుంచి పాలన మొదలవుతుందని ప్రభుత్వం ఇటివల ప్రకటించింది. అయితే.. కొత్త జిల్లాల ఏర్పాటుపై హైకోర్టులో ప్రజా ప్రయోజన వ్యాజ్యం దాఖలైంది. జిల్లాల విభజన రాజ్యాంగ విరుద్ధమంటూ గుంటూరు, శ్రీకాకుళం, ప్రకాశం జిల్లాలకు చెందిన కొందరు హైకోర్టును ఆశ్రయించారు. రేపు హైకోర్టు చీఫ్ జస్టిస్ ప్రశాంత్ కుమార్ మిశ్ర ధర్మాసనం దీనిపై విచారణ జరపనుంది.

కొత్త జిల్లాల ఏర్పాటుపై ప్రభుత్వం తీసుకొచ్చిన నోటిఫికేషన్, 26 జీవోలు ఆర్టికల్ 371కు విరుద్ధమని పిటీషినర్లు పేర్కొన్నారు. ప్రభుత్వ ఉద్యోగాల భర్తీకి జిల్లాలను మార్చే అధికారం ప్రభుత్వానికి లేదని వారు పేర్కొన్నారు. నియామకాల్లో జిల్లా, జోనల్ వ్యవస్థలకు అదే ప్రధానమని వారు పిటిషన్లో పేర్కొన్నారు. రాష్ట్రపతి ఉత్తర్వులను మార్చకుండా 13 జిల్లాలను 26 జిల్లాలుగా విభజించే అధికారం రాష్ట్ర ప్రభుత్వానికి లేదని అన్నారు. ఈ అంశాలను పరిగణలోకి తీసుకుని కొత్త జిల్లాల ఏర్పాటుపై రాష్ట్ర ప్రభుత్వ ఉత్తర్వులను రద్దు చేయాలని వారు కోరారు.