48 గంటల్లో రైతులకు పరిహారం పెంచకపోతే ఉద్యమం చేస్తా: పవన్ కల్యాణ్

నివర్ తుఫానుతో నష్టపోయిన రైతులకు న్యాయం చేయడంలో వైసీపీ ప్రభుత్వం విఫలమైందని జనసేన అధినేత పవన్ కల్యాణ్ అన్నారు. మోపిదేవి మండలం పెదప్రోలులో రైతులను పరామర్శించిన ఆయన మీడియాతో మాట్లాడారు. హైదరాబాద్ వరదల్లో ఇల్లు మునిగితే రూ.10 వేలు పరిహారం ఇచ్చారు. ఇక్కడ ఎకరం పొలం మునిగితే అంతే మొత్తం ఇస్తున్నారు. ఇది ఎంతవరకూ సమంజసం అని ప్రశ్నించారు.

ప్రభుత్వం ఇచ్చే పరిహారం రైతులకు ఏ మాత్రం సరిపోదని అన్నారు. ఎకరానికి రూ.25 నుంచి 30 వేల వరకు పరిహారం ఇవ్వాలని పవన్ కల్యాణ్ డిమాండ్ చేశారు. వైసీపీ పాలనలో రైతులందరికీ న్యాయం జరగడం లేదని మండిపడ్డారు. కౌలు రైతులను ప్రభుత్వం అసలు పట్టించుకోవడం లేదని పవన్ మండిపడ్డారు. పొలం యజమానులతోపాటు కౌలు రైతులకూ పరిహారం ఇవ్వాల్సిందేనని అన్నారు. 48 గంటల్లో కౌలు రైతులకు ఎకరాకు 10వేలు ఇవ్వకపోతే రాష్ట్రవ్యాప్త ఉద్యమం చేస్తానని హెచ్చరించారు. రైతులకు పరిహారం పెంచాలని డిమాండ్ చేశారు.

రైతులకు న్యాయం జరిగేవరకూ పోరాడుతానని పవన్ రైతులకు భరసా ఇచ్చారు. తుఫానుతో నష్టపోయిన రైతులను పరామర్శించని వైసీపీ నేతలపై పవన్ మండిపడ్డారు. కరోనాను పట్టించుకోకుండా పుట్టినరోజు ఫంక్షన్లు బాగానే చేసుకునే నేతలు రైతులను పరామర్శించేందుకు తీరిక లేదా అని ప్రశ్నించారు. అసెంబ్లీలో కూర్చుని విమర్శలు చేయడం కాదు.. రైతులకు ఎలా న్యాయం చేయాలో ఆలోచించాలని ప్రభుత్వాన్ని డిమాండ్ చేశారు.