పవన్ కల్యాణ్ బర్త్ డే స్పెషల్స్: స్టయిల్, మాస్ మేనరిజమ్స్ తో యువతకు పిచ్చెక్కించిన పవన్ కల్యాణ్

చిరంజీవి తమ్ముడిగా పవన్ కల్యాణ్ సినీ ఎంట్రీ ఘనంగా జరిగింది. మొదటి సినిమా అక్కడ అమ్మాయి నుంచి మూడో సినిమా సుస్వాగతం వరకూ పవన్ వరుస హిట్లు సాధించారు. తమ్ముడి కెరీర్ కోసం అన్నయ్య చిరంజీవి స్క్రిప్ట్ సెలక్షన్ బాధ్యత తీసుకున్నారని అంటారు. అయితే.. పవన్ తొలిసారి స్వయంగా విని ఓకే చేసిన ఓ ప్రేమకథ దృశ్యకావ్యంగా తెలుగు సినిమా చరిత్రలో నిలిచిపోయింది. ఆ సినిమానే ‘తొలిప్రేమ’.

మూడు వరుస హిట్లు, చిరంజీవి క్రేజ్, పవన్ పై నమ్మకంతో వచ్చిన ఈ సినిమా వెండితెరపైనే కాదు.. బాక్సాఫీస్ వద్ద కూడా అద్భుతాలు చేసింది. పవన్ కెరీర్ ను ఒక్కసారిగా టాప్ గేర్ లోకి తీసుకెళ్లి.. టాలీవుడ్ కి మరో సూపర్ స్టార్ ని అందించింది. టాలీవుడ్ ప్రేమకథల్లో తొలిప్రేమ ప్రత్యేక స్థానం దక్కించుకుంది.

క్లాస్ అండ్ మాస్ సినిమాలు..

తన కథకు హీరో ఎవరనే దర్శకుడు కరుణాకరణ్ అన్వేషణకు.. చెన్నై ఎయిర్ పోర్టులో ఓ బుక్ స్టాల్లోని సినిమా పత్రికపై ఉన్న పవన్ ఫొటో తెరదించేలా చేసింది. పవన్ కు కథ నచ్చడం సినిమాగా తెరకెక్కడం జరిగింది. ఈ సినిమా తెలుగు సినీ ప్రేక్షకులను కొత్త అనుభూతికి గురి చేసింది. యూత్ ని కట్టిపడేసిన లవ్ ట్రాక్, ఫ్యామిలీ ఎఎమోషన్స్, ఫ్రెండ్స్, పాటల చిత్రీకరణ.. అన్నింటికీ మించి సిస్టర్ సెంటిమెంట్ సినిమాను అత్యున్నతంగా నిలిపాయి. దీంతో యూత్ లో పవన్ క్రేజ్ అమాంతం పెరిగిపోయింది.

తొలిప్రేమ తర్వాత కాలేజీ, ఫ్రెండ్స్, లవ్.. మాస్ నేపథ్యంలో చేసిన తమ్ముడు సినిమా యువతకి పిచ్చెక్కించింది. ముఖ్యంగా కిక్ బాక్సింగ్ ను అద్భుతంగా చూపి.. ఇంగ్లీష్ పాటలో మార్షల్ ఆర్ట్స్ తో యువతను ఆకట్టుకున్నారు. పాటలు, మాస్, కామెడీ టైమింగ్ తో బీ,సీ సెంటర్లలో పవన్ కల్యాణ్ క్రేజ్ మరోస్థాయికి వెళ్లిపోయింది.

క్లాస్ సినిమాలో మాస్ ఎలిమెంట్స్..

అయిదు వరుస హిట్లతో తమ్ముడు తర్వాత పూరి జగన్నాధ్ దర్శకుడిగా పరిచయమవుతూ తెరకెక్కించిన బద్రి మరో సంచలనం. వేరే సినిమా కథ చెప్తానని పవన్ ను కలసి బద్రి కథ చెప్పి ఒప్పించారు పూరి. క్లైమాక్స్ మార్చాలంటూ పూరిని టెస్ట్ చేసి అతని టాలెంట్ ను నమ్మి చేసిన బద్రి బాక్సాఫీస్ వద్ద వండర్స్ క్రియేట్ చేసింది.

మాస్ ఇమేజ్ పెరిగిన పవన్ కల్యాణ్ సాఫ్ట్ లవ్ స్టోరీతో బద్రి చేశారు. సినిమాలో పవన్ మాస్ మేనరిజమ్స్, స్టయిల్, యాక్షన్ తో సినిమాను బ్లాక్ బస్టర్ చేశారు. కోపంతో మెడ మీద చెయ్యి వేసే మేనరిజమ్ పవన్ కు ఐకనిక్ అయింది. ఫ్యాన్స్ ఈ సినిమాను లవ్ స్టోరీగా కంటే యాక్షన్ మూవీగా చూడటం విశేషం.