ఇంతకీ గంటా ఎటువైపు?

మాజీ మంత్రి, విశాఖ నార్త్ ఎమ్మెల్యే గంటా శ్రీనివాసరావు తెలుగుదేశం పార్టీలోనే ఉన్నారా? ఒకవేళ పార్టీలోనే ఉంటే చంద్రబాబుకు స్వాగతం పలకడానికి విశాఖ విమానాశ్రయానికి ఎందుకు రాలేదు? అక్కడ అంత గొడవ జరిగినా ఇంతవరకు ఎందుకు స్పందించలేదు? ఇవీ ప్రస్తుతం తలెత్తుతున్న ప్రశ్నలు. అసలు గంటా వైఖరి ఏమిటి అనేదానిపై పూర్తిగా సందిగ్ధం నెలకొంది.

వాస్తవానికి మొన్నటి ఎన్నికల్లో టీడీపీ ఓడిపోవడంతో గంటా తన భవిష్యత్ కార్యాచరణపై దృష్టి పెట్టారు. బీజేపీలోకి వెళ్లాలా లేక వైసీపీ వైపు మొగ్గాలా అనే విషయంలో తర్జనభర్జనలు పడ్డారు. ఓ దశలో వైసీపీలో చేరడం ఖాయమనే ప్రచారం జరిగింది. మూడు రాజధానులకు మద్దతుగా ఆయన మాట్లాడటంతో ఇక అధికార పార్టీ తీర్థం పుచ్చుకోవడం ఖాయమనే అభిప్రాయాలు వ్యక్తమయ్యాయి. కానీ అంతలోనే.. విశాఖవాసిగా ఆ ప్రాంతానికి రాజధానిని స్వాగతిస్తానని, అదే సమయంలో పార్టీ వైఖరికి కట్టుబడి ఉన్నానంటూ ప్రకటన చేశారు.

దీంతో విశాఖకు ఎగ్జిక్యూటివ్ కేపిటల్ విషయంలో తన వైఖరి ఏమిటనేది స్పష్టంగా చెప్పలేదు. తర్వాత కొంతకాలం సైలెంటుగా ఉన్న గంటా.. మళ్లీ పార్టీ కార్యకలాపాల్లో క్రియాశీలమయ్యారు. పలువురు కార్యకర్తలను తన సమక్షంలో టీడీపీలో చేర్చుకున్నారు. అధినేత చంద్రబాబు తలపెట్టిన యాత్రను తన నియోజకవర్గంలో ప్రారంభించారు. దీంతో అధికార పార్టీలోకి ఆయన వెళ్లడం మానుకున్నారేమోనని అభిప్రాయాలు వచ్చాయి. అయితే, తాజాగా చంద్రబాబు విశాఖ పర్యటనకు వచ్చినప్పుడు గంటా ఎక్కడా కనిపించకపోవడం చర్చనీయాంశమైంది.

సాధారణంగా చంద్రబాబు విశాఖ వస్తే అన్ని విషయాలూ గంటాయే చూసుకునేవారు. విమానాశ్రయానికి వచ్చి స్వాగతం పలకడంతోపాటు పర్యటన మొత్తం బాబు వెంటే ఉండేవారు. అలాంటిది గురువారం విశాఖ వచ్చిన చంద్రబాబును పలకరించడానికి కూడా గంటా రాలేదు. ఈ విషయంలో ఆయన వ్యూహాత్మకంగా వ్యవహరించారా లేక పార్టీ మారే ఆలోచనల్లో ఏమైనా ఉన్నారా అనేది తెలియాల్సి ఉంది.

అక్కడ నిరసన జరుగుతుందని ముందే అందరికీ తెలుసు. ఈ నేపథ్యంలో తాను వారికి టార్గెట్ గా మారడం రాజకీయంగా ఇబ్బంది అవుతుందని భావించి ఈ నిర్ణయం తీసుకున్నారా అనే సందేహాలు వ్యక్తమవుతున్నాయి. దీనిపై ఆయన స్పందిస్తేనే స్పష్టత వస్తుంది.