పవన్ కళ్యాణ్.! మీ సాయం మాకొద్దు.! దేనికి సంకేతమిది.?

‘మాకు ఎవరి సాయమూ అవసరం లేదు.. ప్రభుత్వం మా ఇళ్ళను కూల్చలేదు..’ అంటూ గుంటూరు జిల్లా ఇప్పటం గ్రామంలో ఫ్లెక్సీలు వెలిశాయ్.. కొన్ని ఇళ్ళ ముందర.!

రోడ్ల వెడల్పు పేరుతో ప్రభుత్వం, ఇప్పటం గ్రామంలోని కొన్ని ఇళ్ళను కూల్చివేసిన మాట వాస్తవం. కనిపిస్తున్న శిధిలాలే అందుకు సాక్ష్యం. బస్సు కూడా రాని ఓ చిన్న గ్రామంలో, 120 అడుగుల మేర రోడ్డు విస్తరణ.. అంటే చిన్న విషయం కాదు. సరే, రోడ్ల విస్తరణ విషయంలో ప్రభుత్వాన్ని పూర్తిగా తప్పు పట్టేయలేం. కానీ, పద్దతి ప్రకారం విస్తరణ కోసం కూల్చివేతలు జరిగాయా.? లేదా.? అన్నదే చర్చ ఇక్కడ.

పైగా కూల్చివేతల క్రమంలో మహనీయుల విగ్రహాలు, దేవతా విగ్రహాలు కూడా కూల్చేసి.. వైఎస్సార్ విగ్రహాన్ని మాత్రం అలాగే వుంచేశారు. తీవ్రస్థాయిలో విమర్శలు రావడంతో.. పరువు పోతుందని భావించి, ఆ వైఎస్సార్ విగ్రహాల్నీ ఆ తర్వాత తొలగించారనుకోండి.. అది వేరే సంగతి.

కూల్చివేత తాలూకు శిధిలాలు అంత చక్కగా అక్కడ కనిపిస్తోంటే, ఆ శిధిలాల సాక్షిగానే, ‘ప్రభుత్వం కూల్చలేదు.. మాకు ఎవరి సానుభూతి, సాయం అవసరం లేదు..’ అని కొందరు ఫ్లెక్సీలు ఏర్పాటు చేయడం అందర్నీ విస్మయానికి గురిచేసింది.

‘ఔను, వైఎస్ వివకానందరెడ్డిని ఎవరూ చంపలేదు. ఆయనకు గుండె పోటు వచ్చి, తన తలని బాత్రూమ్ కమోడ్‌తో బద్దలుగొట్టుకుని.. అప్పటికీ ప్రాణం పోకపోవడంతో, గొడ్డలి తెచ్చేసి నరికేసుకున్నారు..’ అంటూ సోషల్ మీడియా వేదికగా ట్రోల్స్ నడుస్తున్నాయి.. ఇప్పటం వ్యవహారంతో.!

‘మాకు సాయం వద్దు మొర్రో..’ అని ఇప్పటం గ్రామంలో ఫ్లెక్సీలు పెట్టాక, ఇక అక్కడ జనసేన అధినేత చేసేదేముంటుంది.? ప్రజలకు అండగా నిలబడటానికి ఆస్కారమేముంటుంది.? ప్రకటించిన లక్ష రూపాయల సాయం కూడా దండగే.. ఇవ్వకపోవడమే మంచిదన్న అభిప్రాయాలు వ్యక్తమవుతున్నాయి.

కానీ, నిజమైన బాధితులున్నారక్కడ. వారికి సాయం అందిస్తానని జనసేనాని ప్రకటించారు. అందిస్తారు కూడా.! 2019 ఎన్నికల్లో వచ్చిన ఓట్లు 15 కూడా లేవు.. 53 ఇళ్ళలో జనసేన సానుభూతిపరులున్నారని చెప్పడమేంటంటూ వైసీపీ అను‘కుల’ మీడియా పిచ్చి రాతలు మొదలు పెట్టింది.

పార్టీలు చూసి సంక్షేమ పథకాలు అమలు చేయడం వైసీపీకి మాత్రమే చెల్లిన విషయం. అధికారం చేతిలో లేకపోయినా, తన సంపాదన నుంచి కులం, మతం, పార్టీలు చూడకుండా సాయం చేయడం జనసేనానికి మాత్రమే చేతనైన గొప్ప పని.