ఏపీలో సంక్షేమ క్యాలెండర్.. ఫ్లాప్ షో అవబోతోందా.?

అధికారంలోకి వస్తూనే కనీ వినీ ఎరుగని రీతిలో ఎడా పెడా సరికొత్త సంక్షేమ పథకాల్ని తెరపైకి తెచ్చారు వైఎస్ జగన్ మోహన్ రెడ్డి. నవరత్నాలు.. దాంతోపాటుగా మరికొన్ని ఆణిముత్యాల్ని సంక్షేమం పేరుతో ప్రజలకు అందిస్తూ, అంతకు మించిన పబ్లసిటీ స్టంట్లు చేస్తూ.. రాష్ట్రాన్ని అప్పుల ఊబిలోకి నెట్టేశారు. ప్రతి ఏడాదీ సంక్షేమ క్యాలెండర్ విడుదల చేసి, దాని ప్రకారం సంక్షేమ కార్యక్రమాలు అమలు చేయాలన్నది జగన్ సర్కార్ ప్లానింగ్. అందుకు తగ్గట్టుగానే కొన్ని పనులు ఇప్పటిదాకా జరిగాయి. కానీ, ఇకపై ఎలా.? కొత్తగా అప్పులు చేయడానికి కేంద్రం కొర్రీలు పెడుతున్న పరిస్థితి.

పెరిగిపోయిన అప్పులకు వడ్డీలు కట్టాలన్నా కష్టంగానే మారుతున్న పరిస్థితి. ఉద్యోగులకు జీతాలు ఇవ్వాలన్నా కొత్త అప్పులు చేయాల్సిందే. ఇంత భయానక పరిస్థితుల నడుమ, సంక్షేమ క్యాలెండర్ అమలవడం అనేది సాధ్యమేనా.? గత ఫిబ్రవరిలో ప్రకటించిన సంక్షేమ క్యాలెండర్ విషయానికొస్తే, ఏప్రిల్ నెలలో అమలవ్వాల్సిన సంక్షేమ పథకాలకు నిధుల కొరత ఏర్పడిందనే ప్రచారం జరుగుతోంది.

సగం నెల గడిచిపోయినా, ఐదు పథకాలకు సంబంధించి నిధుల విడుదల కష్టంగా మారిపోయిందట. దాంతో, ముఖ్యమంత్రి నుంచి ఎప్పుడు సానుకూల సంకేతం వస్తుందా.? అని అధికారులు ఎదురుచూస్తున్నారట. ముఖ్యమంత్రి మీట నొక్కితే తప్ప, నిధులు విడుదలయ్యే పరిస్థితి లేదనీ, అలా మీట నొక్కడానికి కూడా అక్కడ ఖజానాలో నిధుల్లేవనీ ప్రచారం జరుగుతోంది. అయితే, ఇదెంతవరకు నిజం.? అన్నదానిపై భిన్నాభిప్రాయాలు వినిపిస్తున్నాయి.

‘విపక్షాల దుష్ప్రచారం’ అని అధికార పార్టీ చెప్పడం మామూలే. కానీ, ప్రతి నెలా.. ఆదాయం – అప్పుల లెక్కలు బయటకు వచ్చేస్తున్న దరిమిలా, అప్పుల కష్టాల వ్యవహారం బహిరంగ రహస్యమే. ఇప్పుడే ఇలా వుంటే ముందు ముందు సంక్షేమ క్యాలెండర్ అమలు ఎలా.? ఇదొక ఫ్లాప్ షోగా మిగిలిపోతుందా.? రాష్ట్రంలో సంక్షేమ పథకాల్ని పూర్తిగా ఎత్తేయాల్సిన పరిస్థితి వస్తే, ఆ తర్వాత అధికార వైసీపీ పరిస్థితేంటి.? ఏమో, వేచి చూడాల్సిందే.