సీఎం జగన్  తిరుపతి సభ రధ్దు: ఎవరికి భయపడ్డారు చెప్మా.?

రాష్ట్రంలో కరోనా సెకెండ్ వేవ్ తీవ్రత దృష్ట్యా తిరుపతిలో నిర్వహించాల్సిన బహిరంగ సభను రద్దు చేసుకున్నట్లు ఆంధ్రపదేశ్ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి ప్రకటించేశారు. ఈ మేరకు తిరుపతి ప్రజల్ని ఉద్దేశించి మరో లేఖ రాశారు సీఎం జగన్. ఈ నెల 14వ తేదీన సీఎం జగన్, తిరుపతి వెళ్ళాల్సి వున్న విషయం విదితమే. చిత్తూరులో రికార్డు స్థాయిలో కరోనా పాజిటివ్ కేసులు నమోదవుతున్న విషయం విదితమే. కరోనా కేసులు పెరుగుతున్నా, అక్కడ జరుగుతున్న ఉప ఎన్నిక నేపథ్యంలో పెద్దయెత్తున జనం గుమికూడటం మాత్రం తగ్గడంలేదు.

ఏ పార్టీ ఇందుకు అతీతం కాదు. అన్ని పార్టీలూ పెద్దయెత్తున జనాన్ని సమీకరిస్తున్నాయి. అందులో అధికార వైసీపీ కూడా తనవంతు పాత్ర బాగానే పోషిస్తోంది. మరెందుకు ముఖ్యమంత్రి వైఎస్ జగన్, తిరుపతి పర్యటనను రద్దు చేసుకున్నట్లు.? ఇక్కడ ఒకే ఒక్క కీలక అంశం వుంది. అదే, వైఎస్ వివేకానందరెడ్డి హత్య కేసు. అసలు తిరుపతి ఉప ఎన్నికకీ, వైఎస్ వివేకాందరెడ్డి హత్యకేసుకీ సంబంధమే లేదు. కానీ, తిరుపతి ఉప ఎన్నిక వేళ అనూహ్యంగా వైఎస్ వివేకానందరెడ్డి హత్య కేసు చర్చనీయాంశమయ్యింది. తిరుపతి వెంకన్న సాక్షిగా ప్రమాణం చేయాలని టీడీపీ జాతీయ ప్రధాన కార్యదర్శి నారా లోకేష్, ముఖ్యమంత్రి వైఎస్ జగన్ మోహన్ రెడ్డికి సవాల్ విసిరిన విషయం విదితమే. మరోపక్క, సాక్షాత్తూ వైఎస్ వివేకా కుమార్తె ఇటీవల మీడియా ముందుకొచ్చి, తన తండ్రి దారుణ హత్యకు గురై రెండేళ్ళు గడిచినా న్యాయం జరగలేదంటూ కన్నీరు మున్నీరయ్యారు.

వైఎస్ వివేకా కుమార్తె సునీత అలా ఆవేదన వ్యక్తం చేశాక, జగన్ తల్లి విజయమ్మ.. జరుగుతున్న పరిణామాలపై బహిరంగ లేఖ రాయాల్సి వచ్చింది. మరోపక్క, జనసేన అధినేత పవన్ కళ్యాణ్ కూడా, ‘బాబాయ్ హత్య కేసులో దోషుల్ని పట్టుకోలేకపోయిన సీఎం, రాష్ట్రానికి ఎలా న్యాయం చేస్తారు.?’ అని ఇటీవల నిలదీసిన విషయం విదితమే. ఇన్ని సమస్యల నడుమ, ప్రజలకు సమాధానం చెప్పుకోలేక ‘కరోనా’ అనే ఓ సాకు చూసుకుని తిరుపతి బహిరంగ సభను వైఎస్ జగన్ రద్దు చేసుకున్నారనే ప్రచారం జరుగుతోంది.