నో డౌట్, ‘మా’ యుద్ధంలో చిరంజీవిదే గెలుపు.!

గెలిచి ఓడిపోవడం.. ఓడి గెలవడం.. ఈ రెండిటికీ భిన్నమైన అర్థాలుంటాయి. నానా తంటాలూ పడి గెలిచినా, చివరికి అది ఓటమి కిందకే వస్తుంది. ఓడిపోయినా, ఒక్కోసారి.. ‘దీన్ని గెలవడం అంటారు..’ అనే అభిప్రాయం వ్యక్తమవుతుంటుంది.

‘మా’ అధ్యక్ష ఎన్నికల్లో మంచు విష్ణ గెలిచాడు, ప్రకాష్ రాజ్ ఓడిపోయాడు. కానీ, యుద్ధం జరిగింది మోహన్ బాబుకీ, చిరంజీవికీ మధ్య.. అనే ప్రచారం జరిగింది. అలా ‘యుద్ధాన్ని’ కొత్త కోణంలోకి మార్చేందుకు ‘మంచు’ వర్గం పడ్డ పాట్లు అన్నీ ఇన్నీ కావు. అయితే, నాగబాబు తప్ప, మెగా కాంపౌండ్ నుంచి ఎవరూ ‘మా’ ఎన్నికల కోసం ప్రత్యక్షంగా హంగామా చేసింది లేదు.

విష్ణు గెలిచాక, ‘మోహన్ బాబు గెలిచారు.. చిరంజీవి ఓడిపోయారు..’ అనే ప్రచారాన్ని సినీ పరిశ్రమలో ‘మంచు’ వర్గం గట్టిగా చేయగలిగింది. మీడియాని కూడా అలాగే మేనేజ్ చేశారు. కానీ, గెలిచిన మంచు విష్ణు.. ఎక్కే గుమ్మం దిగే గుమ్మం.. అన్నట్టు, పలువురు ప్రముఖుల వద్దకు వెళ్ళి కలిశాడు. మోహన్ బాబు కూడా తన కుమారుడ్ని వెంటబెట్టుకుని నందమూరి బాలకృష్ణ దగ్గరకు వెళ్ళిన విషయం విదితమే.

ఇక, ‘మా’ వ్యవస్థాపక అధ్యక్షుడైన చిరంజీవి వద్దకు మాత్రం మంచు విష్ణు, మంచు మోహన్ బాబు వెళ్ళినట్టు లేదు. వెళ్ళకపోవడం వల్ల చిరంజీవికి వచ్చిన నష్టమూ లేదు. కాగా, ప్రకాష్ రాజ్ ప్యానెల్ నుంచి గెలిచిన సభ్యులెవరూ, ‘మా’ కార్యవర్గం ప్రమాణ స్వీకారం కార్యక్రమానికి హాజరు కాకపోవడం మరో ఆసక్తికరమైన అంశం.

ఇంకోపక్క, మంచు కుటుంబం నుంచి మంచు మనోజ్, ఇటీవల జనసేన అధినేత, సినీ నటుడు పవన్ కళ్యాణ్ వద్దకు వెళ్ళారు. దాంతో, ‘మంచు’ వర్గం, మెగా కాంపౌండ్‌ని ప్రసన్నం చేసుకునేందుకు ప్రయత్నిస్తోందన్న ప్రచారానికి బలం చేకూరింది. నిజానికి, మంచు మనోజ్ రూటే సెపరేటు. అతనెప్పుడూ, మెగా కాంపౌండ్‌కి కాస్త దగ్గరగానే వుంటూ వస్తున్నాడు.

నిజానికి, మంచు విష్ణు కావొచ్చు.. మోహన్ బాబు కావొచ్చు.. తమకు అవసరమైనప్పుడు చిరంజీవిని ఆకాశానికెత్తేయడం పలు సందర్భాల్లో జరిగింది. సో, ఎలా చూసుకున్నా.. ఈ ‘మా’ వ్యవహారంలో, చిరంజీవికి కలిగిన నష్టమేమీ లేదు. ఏదో నష్టం జరిగిపోయిందంటూ ‘మంచు’ వర్గం దుష్ప్రచారం చేయడం మినహా. నిజానికి, ఈ ‘అతి’ జరగడానికి మరో కీలకమైన కారణం శకుని నరేష్. ఆ శకుని ‘మా’ విషయంలో మంచు విష్ణుని ముంచేసే రోజెంతో దూరంలో లేదు.