ఔనా! నిజమా.? ఆంధ్రప్రదేశ్‌లో నిధుల కొరత లేదా.?

అప్పు చేస్తే తప్ప పూటగడవని దుస్థితి ఆంధ్రప్రదేశ్ రాష్ట్రానిది. ఎవరు ఔనన్నా ఎవరు కాదన్నా ఇది కళ్ళ ముందు కనిపిస్తోన్న వాస్తవం. ప్రతి నెలా కొత్త అప్పు చేయాల్సిందే.. నెలవారీ అప్పులే కాదు, మధ్యంతరంగా.. అంటే, నెల మధ్యలో ఎప్పటికప్పుడు అప్పుల కోసం పరుగులు పెట్టకపోతే, రాష్ట్రం అనే బండి ముందుకు కదలడంలేదు.

ఉద్యోగులకు జీతాలు ఇవ్వడమే కనాకష్టంగా మారిపోయింది. కరోనా అనేది ఓ కుంటి సాకు మాత్రమే. సంక్షేమ పథకాల పేరుతో ఓటు బ్యాంకు రాజకీయాలు చేస్తూ, రాష్ట్ర ప్రజల నెత్తిన కనీ వినీ ఎరుగని స్థాయిలో అప్పుల భారం మోపేస్తోంది వైఎస్ జగన్ సర్కార్. పబ్లిసిటీ వైఎస్ జగన్ మోహన్ రెడ్డిది.. అప్పుల భారం మోసేదేమో రాష్ట్ర ప్రజలు.

సంక్షేమ పథకాలన్నటికీ వైఎస్ జగన్ మోహన్ రెడ్డి పేరు లేదంటే.. వైఎస్ రాజశేఖర్ రెడ్డి పేరు.. ఇదేదో ‘వైఎస్’ కుటుంబం కోసం రాష్ట్ర ప్రజలు తమ కష్టాన్ని వెచ్చించాల్సి వస్తున్నట్టుంది. లేకపోతే, ఆ ప్రకటనలేంటి.? ఆ పేర్లేంటి.? ఆ పథకాల కోసం చేస్తున్న అప్పులేంటి.? అని ప్రజాస్వామ్యవాదులు గుస్సా అవుతున్నారు.

ఇక, అసలు విషయానికొస్తే, రాష్ట్రంలో కరెంటు సంక్షోభం కనిపిస్తోంది. అబ్బే, ఇది దేశవ్యాప్త సంక్షోభం.. అంటూ జగన్ సర్కార్ కహానీలు వినిపిస్తోంది. ఇతర రాష్ట్రాల సంగతి మనకెందుకు.? ఆంధ్రప్రదేశ్ రాష్ట్రం పరిస్థితేంటి.? అంటే, ‘నిధుల కొరత లేదు.. ఎంత ఖర్చయినా విద్యుత్తుని కొనేస్తాం..’ అంటూ వైఎస్ జగన్ సర్కార్ చెబుతోంది.

నిధుల కొరత లేకపోవడమేంటి.? జీతాలు ఇవ్వలేని దుస్థితికి నిధుల కొరత కారణం కాదా.? అప్పులు ఎడా పెడా దొరికేస్తోంటే, అడ్డగోలుగా ఖర్చు చేస్తూ.. నిధుల కొరత లేదని అనడం హాస్యాస్పదం కాక మరమేటి.? అన్నట్టు, కాంట్రాక్టర్లకు చెల్లింపులు జరగడంలేదు, దాంతో కాంట్రాక్టర్లు రోడ్డున పడుతున్నారు బిచ్చగాళ్ళలా. హైకోర్టు నుంచి మొట్టికాయలు పడుతున్నాయి ప్రభుత్వానికి చెల్లింపుల విషయంలో. అక్కడేమో నిధుల కొరతని సాకుగా చూపుతోంది జగన్ సర్కార్. ఇప్పుడేమో నిధుల కొరత లేదంటోంది.. దేన్ని నమ్మాలి.?