నేలకు దిగొస్తున్న నేపాల్

చైనా అండ చూసుకుని ఎప్పటి నుంచో మిత్రదేశంగా ఉన్న భారత్ పైనే కయ్యానికి కాలు దువ్విన నేపాల్ కు నెమ్మదిగా తత్వం బోధపడుతోంది. డ్రాగన్ తమ వెన్నంటే ఉందనే మిడిసిపాటుతో మనపై అవాకులు చెవాకులు పేలి.. గాలిలో తేలియాడిన మన పొరుగుదేశం నేలకు దిగుతోంది. భారత్ లో అంతర్భాగమైన కాలాపానీ తమదే అంటూ హడావుడి చేసిన నేపాల్.. గతనెలలో ఉత్తరాఖండ్ లోని దార్చులా జిల్లా పిథోర్ గఢ్ సమీపంలో ఆరు చెక్ పోస్టులు ఏర్పాటు చేసింది. నేపాలీ శహస్త్ర ప్రహారీ (ఎన్ఎస్ పీ) వీటిని నిర్వహిస్తోంది. అయితే, వీటిలో రెండు పోస్టులను నేపాల్ తొలగించింది.

నిజానికి సరిహద్దుల్లో తమ భద్రతకు ముప్పు ఏర్పడినా.. పొరుగుదేశం నుంచి ఏవైనా కవ్వింపు చర్యలు ఉన్నా చెక్ పోస్టులు పెడుతుంటారు. కానీ భారత్ నుంచి నేపాల్ కు అలాంటి పరిస్థితి లేదు. నేపాల్ తో మనకు ఎప్పటి నుంచో సత్సంబంధాలు ఉన్నాయి. కానీ నేపాల్ ప్రధాని కేపీ ఓలి భారత్ వ్యతిరేక గళం విప్పడం.. చైనా అండ చూసుకుని చెలరేగిపోవడం వంటి పరిణామాలు ఇటీవల చోటుచేసుకున్నాయి. భారత్ లోని కొన్ని భూభాగాలు తమవేనని పేర్కొంటూ మ్యాప్ ఆమోదించడం.. కాలాపానీ కూడా తమదేనని, దానిని తమకు ఇచ్చేయాల్సిందేనని పిచ్చి వ్యాఖ్యలు చేయడం.. ఉత్తరాఖండ్ సరిహద్దుల్లో ఆరు చెక్ పోస్టులు పెట్టడం వంటి చర్యలతో మనకు వ్యతిరేకంగా మారింది.

అయితే, ఈ పరిణామాలు నేపాల్ ప్రజలకే కాదు.. ఓలి పార్టీలోని నేతలకు కూడా నచ్చలేదు. ముఖ్యంగా భారత్, నేపాల్ ప్రభుత్వాల మధ్య కంటే ప్రజల మధ్య చక్కని సంబంధాలున్నాయి. నేపాల్ కు చెందిన గూర్ఖాలు భారత సైన్యంలో దాదాపు 30వేల మంది ఉన్నారు. అలాగే మన సైన్యంలో పనిచేసి రిటైరైన తర్వాత నేపాల్ వెళ్లి స్థిరపడిన జవాన్ల కుటుంబాలకు భారత ప్రభుత్వమే ఇప్పటికీ పెన్షన్ చెల్లిస్తోంది. అలాంటి నమ్మకమైన మిత్రదేశంగా ఉన్న భారత్ పట్ల వ్యతిరేకత ప్రదర్శిస్తున్న ఓలికి సొంత పార్టీ నేతలత నుంచే గట్టి సెగ తగిలింది.

పైగా ఏ చైనా కోసం భారత్ తో కయ్యం పెట్టుకోవడానికి ప్రయత్నించిన నేపాల్ ను సైతం డ్రాగన్ వదిలిపెట్టలేదు. ఆ దేశానికి చెందిన కొంత భూభాగాన్ని ఇటీవలే చైనా ఆక్రమించుకుంది. ఈ పరిణామాలన్నింటి నేపథ్యంలో.. ముఖ్యంగా భారత వ్యతిరేక చర్యలకు తెర తీసిన ఓలికి వ్యతిరేకంగా నేపాల్ కమ్యూనిస్టు పార్టీ కీలక నేత ప్రచండ సహా పలువురు గళం విప్పారు. ఆయన్ను రాజీనామా చేయాల్సిందేనని తేల్చి చెప్పారు. దీనికి సంబంధించి బుధవారం కీలక సమావేశం జరగనుంది.

ఇదే సమయంలో భారత్, చైనా సరిహద్దుల్లో ఘర్షణపూరిత వాతావరణ చల్లబడటం.. చైనా బలగాలు వెనక్కి తగ్గడంతో నేపాల్ కూడా కిందకు దిగి వచ్చింది. భారత సరిహద్దుల్లో ఏర్పాటు చేసిన రెండు చెక్ పోస్టులను తొలగించింది. మరో మూడింటిని కూడా త్వరలోనే తొలగించే అవకాశం ఉంది.