చంద్రబాబుకి ముద్రగడ లేఖాస్త్రం: తెరవెనుక ఎవరు.?

మాజీ మంత్రి ముద్రగడ పద్మనాభం.. లేఖలు రాయడంలో దిట్ట. అందునా, తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబునాయుడికి ముద్రగడ రాసే లేఖలు మరీ ప్రత్యేకంగా వుంటాయి. తాజాగా ముద్రగడ, చంద్రబాబుపైకి ఓ లేఖాస్త్రం సంధించారు.

చంద్రబాబు హయాంలో ముద్రగడ కాపు రిజర్వేషన్లంటూ ఉద్యమం చేసిన విషయం విదితమే. అప్పట్లో ముద్రగడ ఉద్యమం కారణంగా రైలు తగలబడింది.. నానా రకాల బీభత్సమూ జరిగింది. సరే, దాని వెనుక ఎవరున్నారు.? అన్నది వేరే చర్చ. కానీ, ముద్రగడ ఉద్యమం వల్ల లాభపడింది మాత్రం వైఎస్సార్ కాంగ్రెస్ పార్టీనే. ఇందులో ఇంకో మాటకు తావు లేదు.

మరి, ముద్రగడ సాధించిందేంటి.? కనీసం సానుభూతి కూడా పొందలేకపోయారు. పైగా, ముద్రగడ కుటుంబం చాలా ఇబ్బందులు ఎదుర్కొంది అప్పట్లో. ఆనాటి ఆ చీకటి రోజుల్ని ముద్రగడ తాజాగా గుర్తు చేసుకున్నారు తన లేఖాస్త్రంలో. కాదు కాదు, చంద్రబాబుకి తెలియజేశారు. పుండు మీద కారం చల్లిన చందాన తయారైందిప్పుడు చంద్రబాబు పరిస్థితి ముద్రగడ లేఖ కారణంగా.

అయితే, ముద్రగడ తన లేఖలో.. అప్పట్లో పోలీసులు తన కుటుంబ సభ్యులు.. అందునా మహిళల్ని బూతులు తిట్టిన వైనం గురించి సవివరంగా పేర్కొన్నారు.. అది మాత్రం అస్సలు క్షమార్హం కాదు. ‘మా ఇంట్లో ఆడవాళ్ళను మీరు తిట్టించారు.. ఇప్పుడేమో మీ భార్యని ఎవరో తిట్టారంటూ మీడియా ముందుకొచ్చి కంటతడి పెడుతున్నారు..’ అంటూ చంద్రబాబుపై ఎద్దేవా చేశారు ముద్రగడ.

‘మీ కంటే మా కుటుంబానికి ఎక్కువ గౌరవం, చరిత్ర వున్నాయి..’ అని ముద్రగడ పేర్కొనడం మరో ఆసక్తికరమైన అంశమిక్కడ. ఇంతకీ, ముద్రగడ లేఖ వెనుక ఎవరున్నారు.? ఆయనైతే ఇలాంటి భాష ప్రయోగిస్తూ లేఖ రాసే అవకాశం లేదు. మరెవరు రాశారు.? ఎవరు రాయించారు.? అంతలా బూతులెందుకు ప్రయోగించారు.? ఏమో మరి ముద్రగడకే తెలియాలి.