శాసన మండలి రద్దు నిర్ణయం వెనక్కి.. దీన్నేమంటరు అధ్యక్షా.?

‘వైఎస్ జగన్ మోహన్ రెడ్డి.. మాట తప్పేది లేదు.. మడమ తిప్పేది లేదు.! జగనన్న చెప్పాడంటే, చేస్తాడంతే.!’ ఇలా వైసీపీ నేతలు చెప్పే డైలాగులు అన్నీ ఇన్నీ కావు. చెప్పే మాటలకీ, చేసే పనులకీ అస్సలు పొంతన లేకపోవడమే రాజకీయ నాయకుల లక్షణం. వైఎస్ జగన్ మోహన్ రెడ్డి అందుకు అతీతుడేమీ కాదు.

అమరావతి విషయంలో గతంలో వైఎస్ జగన్ ఏం చెప్పారు, ఆ తర్వాత ఏం చేశారు.? ప్రతిపక్ష నేతగా వున్నప్పుడు, అధికారంలోకి వచ్చాక.. వైఎస్ జగన్ మోహన్ రెడ్డి మాటల్ని చూస్తేనే.. ఆయన ఎంతలా మాట తప్పుతారో, ఎంతలా మడమ తిప్పేస్తారో అర్థమవుతుంది.

ఇక, ఇప్పుడు శాసన మండలి వంతు. శాసన మండలిని రద్దు చేస్తూ వైఎస్ జగన్ ప్రభుత్వం కొన్నాళ్ళ క్రితం నిర్ణయం తీసుకుంది. సరే, కేంద్రం ఆ వ్యవహారంపై ‘నాన్చివేత వైఖరి’ అవలంబించిందనుకోండి.. అది వేరే విషయం. ‘మాట ఇచ్చాం.. రద్దు చేసేదాకా వెనక్కి తగ్గే ప్రసక్తే లేదు. రద్దుకే కట్టుబడి వున్నాం..’ అని నిన్న మొన్నటిదాకా వైసీపీ చెబుతూ వచ్చింది.

కానీ, వైసీపీ అధినేత.. ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి రివర్స్ గేర్ వేశారు.. యూ టర్న్ తీసుకున్నారు.. ఏ శాసన మండలిని అయితే ఖర్చు దండగ వ్యవహారంగా అభివర్ణించారో.. ఏ శాసన మండలి రద్దు కోంస పోరాడతామన్నారు.. ఆ రద్దు నిర్ణయాన్నిప్పుడు వెనక్కి తీసుకున్నారు.

ఈ మేరకు శాసన సభలో శాసన సభ వ్యవహారాల మంత్రి బుగ్గన రాజేంద్రనాథ్ తీర్మానం ప్రవేశపెట్టారు. శాసన మండలిలో అధికార వైసీపీ బలం పెరుగుతుండడం.. రాజకీయ నిరుద్యోగుల సంఖ్య పార్టీలో పెరిగిపోతుండడంతో.. ‘పునరావాసం’ కోటాలో శాసన మండలిని వాడుకోవాలని వైఎస్ జగన్ సర్కార్ సిద్ధమయ్యిందంటూ సోషల్ మీడియాలో సెటైర్లు పడుతున్నాయ్.

మాట మీద నిలకడలేని పాలన.. తీసుకున్న నిర్ణయాలకు కట్టుబడి వుండలేని దయనీయ స్థితి.. ఇదీ వైసీపీ నడుపుతోన్న ఘనమైన రాజకీయం.