గులాబీ పార్టీకి షాక్: నాగార్జున సాగర్‌లో నామినేషన్ల సునామీ.!

ఒకరు కాదు, ఇద్దరు కాదు.. ఏకంగా 400 మంది నామినేషన్లు వేసేశారు నాగార్జున సాగర్ అసెంబ్లీ నియోజకవర్గ ఉప ఎన్నిక కోసం. అదీ అధికార తెలంగాణ రాష్ట్ర సమితికి పోటీగా. సిట్టింగ్ ఎమ్మెల్యే నోముల నర్సింహయ్య (తెలంగాణ రాష్ట్ర సమితి నేత, ఒకప్పటి వామపక్ష నేత) అనారోగ్యంతో కన్నమూయడం వల్ల తలెత్తిన ఉప ఎన్నిక ఇది. ఇక్కడ గెలవడం అధికార తెలంగాణ రాష్ట్ర సమితికి ‘లైఫ్ ఆర్ డెత్’ లాంటి సమస్యగా మారిన విషయం విదితమే.

దుబ్బాక రిజల్ట్ రిపీటవుతుందని బీజేపీ చెబుతోంటే, స్థానికంగా వున్న సెంటిమెంట్ ప్రకారం తామే గెలుస్తామని కాంగ్రెస్ పార్టీ చెబుతోంది. ఈ పరిస్థితుల్లో సిట్టింగ్ స్థానం నిలబెట్టుకోవడం తెలంగాణ రాష్ట్ర సమితికి అంత ఈజీ కాదు మరి. సరిగ్గా సమయం చూసి అమరవీరుల కుటుంబాలు అధికార పార్టీకి షాకిచ్చాయి. మొత్తంగా 400 పైగానే నామినేషన్లు వేయాలని అనుకున్నా, కొన్ని అనివార్య పరిస్థితుల వల్ల 400 నామినేషన్లతోనే సరిపెట్టారు.

గతంలో నిజామాబాద్ లోక్‌సభ స్థానానికి ఇలాగే పెద్దయెత్తున నామినేషన్లు దాఖలయ్యాయి.. అప్పట్లో పసుపు రైతులు గులాబీ పార్టీపై గుస్సా అయ్యారు. ఆ దెబ్బ కారణంగానే తెలంగాణ ముఖ్యమంత్రి కేసీఆర్ కుమార్తె కవిత ఓడిపోవాల్సి వచ్చింది. మరి, నాగార్జున సాగర్ ఉప ఎన్నికలో ఏం జరగబోతోంది.? ఏమోగానీ, అధికార పార్టీ ఈ విపరీత పరిణామాన్ని చూసి షాక్‌కి గురైనా వెంటనే తేరుకుని, అమరవీరుల కుటుంబాలతో చర్చలు జరిపేందుకు ప్రత్యేక బృందాల్ని ఏర్పాటు చేసిందట. ఈ బృందాలకు పార్టీ సీనియర్ నేతలు నాయకత్వం వహిస్తున్నట్లు తెలుస్తోంది.

అయినాగానీ, ‘వెనక్కి తగ్గే ప్రసక్తే లేదు..’ అని అమరవీరుల కుటుంబాలు తేల్చి చెబుతున్నాయట. ఇదెక్కడి చోద్యం.? ఇదెక్కడి వైపరీత్యం.? అని అనుకోవడానికి వీల్లేదు. ఇది ప్రజాస్వామ్యం.. 400 కాకపోతే, 4000 మంది అయినా నామినేషన్లు వేసుకోవచ్చు.