జస్ట్ ఆస్కింగ్: మోహన్‌బాబు లేఖ రాయాల్సింది ఎవరికి.?

సినీ నటుడు మోహన్‌బాబు, ఓ బహిరంగ లేఖ విడుదల చేసిన సంగతి తెలిసిందే. సినీ పరిశ్రమ అంతా ఒక్కతాటిపైకి రావాలనీ, పరిశ్రమ సమస్యలపై గొంతు విప్పాలనీ, రెండు ప్రభుత్వాలతో చర్చలు జరిపి, సమస్యల పరిష్కారం కోసం పని చేయాలనీ మోహన్‌బాబు ఆ బహిరంగ లేఖలో పేర్కొన్నారు.

ఇందులో కొత్తేముంది.? అంటారా.! వుంది.. ‘మనకెందుకు మనకెందుకు అని మౌనంగా వుండాలా.? నా మౌనం చేతకానితనం కాదు. చేవలేనితనం కాదు..’ అంటూ బహిరంగ లేఖలో పేర్కొన్నారు సీనియర్ నటుడు మోహన్‌బాబు. ‘చేతకానితనం కాదు, చేవలేనితనం కాదు..’ అంటున్న మోహన్‌బాబు, ఇప్పటిదాకా చూపించిన ‘చేవ’ ఏంటి.? అన్న ప్రశ్న సినీ పరిశ్రమలోనే వినిపిస్తోంది.

ఆంధ్రప్రదేశ్‌లో సినిమా థియేటర్ల వ్యవహారం, టిక్కెట్ల వ్యవహారంపై పెద్ద దుమారమే రేగుతోంది. మోహన్‌బాబు తనయుడు మంచు విష్ణు, ‘మా’ (మూవీ ఆర్టిస్ట్స్ అసోసియేషన్) అధ్యక్షుడు. ఆయన్ని ఆ పదవిలో కూర్చోబెట్టింది స్వయానా మోహన్‌బాబు. అలాంటప్పుడు, తన సినిమాకి టిక్కెట్ల వివాదం వల్ల ఇబ్బందులొస్తున్నాయని నటుడు నాని ఆవేదన వ్యక్తం చేసినప్పుడు, మోహన్‌బాబుగానీ ‘మా’ అధ్యక్షుడు విష్ణుగానీ ఎందుకు స్పందించలేకపోయాడు.?

నిజానికి, టిక్కెట్ల తగ్గింపు చిన్న సినిమాలకు మేలు చేస్తుంది. కానీ, చిన్న సినిమా నటుడు శ్రీవిష్ణు, టిక్కెట్ల ధరల తగ్గింపు పట్ల ఆవేదన వ్యక్తం చేశాడు. పెట్రోల్, డీజిల్ ధరలు తగ్గించరుగానీ, సినిమా టిక్కెట్ల ధరలు తగ్గిస్తారా.? అని ప్రశ్నించాడు శ్రీవిష్ణు. మరి, ఈ అంశంపై మోహన్‌బాబు లేదా విష్ణు ఎందుకు స్పందించలేకపోయినట్టు.?

మోహన్‌బాబు సీనియర్ నటుడు, నిర్మాత కూడా. ఆయన ఇంట్లో మంచు విష్ణు, మంచు లక్షి, మంచు మనోజ్.. నటనా రంగంలోనూ, నిర్మాణ రంగంలోనూ వున్నారు. మరి, వీళ్ళంతా పరిశ్రమని ఏకతాటిపైకి తెచ్చేందుకు వివిధ విభాగాలతో ఎందుకు ఇప్పటిదాకా సంప్రదింపులు చేయలేకపోయారు.?

‘మా’ ఎన్నికల కోసం అందర్నీ కూడదీసిన మోహన్‌బాబు, సినీ పరిశ్రమ తీవ్ర ఇబ్బందుల్ని ఎదుర్కొంటున్న ప్రస్తుత పరిస్థితుల్లో బహిరంగ లేఖతో, తన గొప్పలు చెప్పుకోవడం వల్ల పరిశ్రమకు వీసమెత్తు ప్రయోజనం వుంటుందా.? అన్నది సినిమా పరిశ్రమలోనే వినిపిస్తోన్న బలమైన అభిప్రాయం.