కాటేసిందని పామునే కరిచి చంపేశాడు!

కుక్క మనిషిని కరిస్తే వార్త కాదు.. కానీ మనిషి కుక్కను కరిస్తే కచ్చితంగా వార్తే. సరిగ్గా ఇలాంటి సంఘటనే ఉత్తరప్రదేశ్ లో చోటుచేసుకుంది. తనను కాటేసిందనే కోపంతో ఓ యువకుడు పామును కరిచి చంపేశాడు. ఇటాహ్ సమీపంలోని అస్రౌలీ గ్రామానికి చెందిన రాజ్ కుమార్ అనే యువకుడు ఆదివారం రాత్రి పీకలదాకా మద్యం తాగి ఇంటికి వచ్చాడు.

ఈ క్రమంలో ఓ పాము అతడిని కాటేసింది. దీంతో కోపంతో ఊగిపోయిన అతడు.. నన్నే కాటేస్తావా అంటూ పాము మీద పడ్డాడు. దానిని ముక్కలుగా కొరికి చంపేశాడు. అయితే అతడి పరిస్థితి కూడా విషమించడంతో అపస్మారక స్థితిలోకి వెళ్లిపోయాడు. వెంటనే అతడ్ని సమీపంలోకి ఆస్పత్రిలోకి తీసుకెళ్లగా.. అక్కడి నుంచి పెద్దాస్పత్రికి రిఫర్ చేశారు. ‘‘నా కుమారుడు తాగి ఉన్నాడు. ఆదివారం రాత్రి మా ఇంట్లోకి వచ్చిన పాము అతడిని కాటేసింది. వెంటనే వాడు దానిని పట్టుకుని రెండు ముక్కలుగా కొరికేశాడు. ప్రస్తుతం మావాడి పరిస్థితి విషమంగా ఉంది. అతడి చికిత్సకయ్యే ఖర్చు మేం భరించే స్థితిలో లేం’’ అని రాజ్ కుమార్ తండ్రి బాబూరాం తెలిపారు.

రాజ్ కుమార్ పరిస్థితి విషమంగానే ఉందని అతడికి చికిత్స చేసిన వైద్యుడు తెలిపారు. ‘‘నా దగ్గరకి ఓ రోగి వచ్చాడు. తాను పామును కరిచానని చెప్పాడు. పాము అతడిని కరిచిందని నేను అర్థం చేసుకుని చికిత్స చేశారు. అతడి పరిస్థితి విషమంగా ఉండటంతో పెద్దాస్పత్రికి రిఫర్ చేశాం’’ అని ఆ డాక్టర్ తెలిపారు. కాగా, రాజ్ కుమార్ కొరికి చంపిన పామును అతడి కుటుంబ సభ్యులు పాతిపెట్టారు. రెండు వారాల క్రితం ఇలాంటి ఘటనే గుజరాత్ లో జరిగింది.

మహిసాగర్ జిల్లాలోని అజాన్ వా గ్రామంలో పర్వత్ గాలా బారియా అనే వృద్ధుడిని పాము కాటేసింది. వెంటనే అతడు కూడా దానిని కరిచి చంపేశాడు. అనంతరం చికిత్స పొందుతూ కన్నుమూశాడు. అతడు పొలంలో పని చేస్తుండా పాము వచ్చింది. అతడితోపాటు ఉన్నవారంతా భయపడి దూరంగా పారిపోగా.. బారియా మాత్రం దానిని పట్టుకోవడానికి ప్రయత్నించాడు. గతంలో పాములను పట్టుకున్న అనుభవం ఉండటంతో ఒడుపుగా పామును పట్టుకున్నాడు. కానీ అది అతడి చేతిపైనా, ముఖంపైనా కాటు వేసింది. దీంతో బారియా కోపోద్రిక్తుడై పామును కొరికి చంపేశాడు. అనంతరం అతడిని ఆస్పత్రికి తరలించగా చికిత్స పొందుతూ చనిపోయాడు.