బాల నటుడిగా నిరూపించుకున్న మహేశ్ బాబు పూర్తిస్థాయి హీరోగా ఫుల్ ఛార్మింగ్ లుక్, రొమాంటిక్, పాల బుగ్గల మేని ఛాయతో తెలుగు సినిమాకు గ్లామర్ తీసుకొచ్చారు. దీంతో ఘట్టమనేని అభిమానులు ఆయన్ను ప్రిన్స్ మహేశ్ అని పిలుచుకున్నారు. అయితే.. తండ్రికి తగ్గ వారసుడిగా నటనలో మాస్ యాంగిల్ చూపడంతో ఆయన స్టేటస్ మారిపోయి సూపర్ స్టార్ అయిపోయారు. అలా.. మహేశ్ నటనలోని పదును చూపిన దర్శకుడు పూరి జగన్నాథ్. ఆ సినిమానే ‘పోకిరి’. బాక్సాఫీస్ వద్ద పోకిరి సృష్టించిన సంచలనానికి, మహేష్ ఒన్ మ్యాన్ షోకి మహేశ్ కెరీర్లోనే తొలి ఇండస్ట్రీ హిట్ గా నిలిచింది. రాష్ట్రంలో ఎక్కడ చూసినా హౌస్ ఫుల్స్. మహేశ్ అభిమానులకే కాదు.. తెలుగు సినిమాకి పోకిరి గర్వకారణం.
మహేశ్ ను మార్చిన పూరి..
సినిమా కథ మాఫియా, గ్యాంగ్ స్టర్, గన్ కల్చర్ తో ఉంటుంది. కథకు దర్శకుడు పూరి ఇచ్చిన టచప్ అద్భుతం. మహేశ్ హైర్ స్టైల్, డ్రెస్సింగ్, డైలాగ్ మాడ్యులేషన్ పూర్తిగా మార్చాడు. ‘ఎవడు కొడితే దిమ్మ తిరిగి మైండ్ బ్లాక్ అయిపొద్దో.. ఆడే పండుగాడు ‘ అనే డైలాగ్ పేలిపోయింది. “నేనెంత ఎదవనో నాకే తెలీదు, గన్ స్టైల్ గా తిప్పటం.. సినిమాలు చూడటం లేదేంటి..” అనే డైలాగులకు ఫ్యాన్స్ ఊగిపోయారు. 80ల స్టయిల్లో అప్పటి వరకూ పోకిరీగా ఉండి క్లైమాక్స్ లో పోలీస్ అధికారిగా మహేశ్ ఎంట్రీ సీన్ సినిమాకే హైలైట్. సినిమాని ఎంజాయ్ చేస్తున్న ప్రేక్షకులు.. ఒక్కసారిగా అటెన్షన్ అయిపోతారు. సినిమాను ఆకాశమంత ఎత్తులో కూర్చో బెట్టిన సన్నివేశం అది. సినిమాకు మణిశర్మ సంగీతం మేజర్ ఎస్సెట్. పోకిరితో ఇలియానా ఓవర్ నైట్ స్టార్ అయిపోయింది. తన అందం, గ్లామర్ తో కొన్నాళ్ళు టాలీవుడ్ ని ఏలేసింది.
బాక్సాఫీస్ భీభత్సం..
వైష్ణో అకాడెమీ, ఇందిరా ప్రొడక్షన్స్ బ్యానర్ పై పూరి జగన్నాథ్, మహేశ్ సోదరి మంజుల సంయుక్తంగా నిర్మించిన ఈ సినిమా 200 సెంటర్లలో 100, 15 సెంటర్లలో 200 రోజులు ఆడింది. కర్నూలులో షిఫ్టులతో 561 రోజులు ఏకధాటిగా ఆడింది. ‘ఏ ముహూర్తాన పోకిరి కథ రాశానో.. జాతీయ స్థాయిలో 200 కోట్ల బిజినెస్ చేసింది’ అని పూరి జగన్నాథ్ ఓ ఇంటర్వ్యూలో చెప్పుకొచ్చారు. అంతటి సంచలనాలు, అద్భుతాలు పోకిరి సొంతం. ఈనెల 9న మహేశ్ పుట్టినరోజు సంధర్భంగా ఫ్యాన్స్ పోకిరి 4k ప్రింట్ తో హైదరాబాద్ లో ప్రత్యేక షో ప్లాన్ చేస్తే టికెట్స్ గంటలోపే అమ్ముడైపోయాయి. ఈ మొత్తాన్ని మహేశ్ చారిటీకి విరాళంగా ఇవ్వనున్నారు మహేశ్ అభిమానులు.
476477 30539extremely good post, i truly enjoy this web web site, keep on it 996067