బాలయోగి ఆస్తులు నేను కొట్టయడం నిజమే..!

విజయవాడ ఎంపీ కేశినేని నాని, టీడీపీ ఎమ్మెల్సీ బుద్ధా వెంకన్న మధ్య ట్వీట్ల వార్ కి ఇంకా ముగింపు పడలేదు. గత రెండు రోజులుగా ట్విట్టర్ వేదికగా ఒకరిపై మరొకరు తీవ్ర పదజాలంతో ఆరోపణలు చేసుకున్న సంగతి తెలిసిందే. చంద్రబాబు పెట్ డాగ్ అంటూ బుద్దా వెంకన్నని ఉద్దశించి నాని తీవ్ర వ్యాఖ్యలు కూడా చేశారు. దానికి బుద్దా కూడా ఘాటుగానే సమాధానమిచ్చారు. అయితే, తదనంతర పరిణామాల నేపథ్యంలో పార్టీపైనా, చంద్రబాబుపైనా గౌరవంతో ఇక తాను ఎలాంటి ట్వీట్లు చేయనని బుద్ధా వెంకన్న వెనక్కి తగ్గారు.

అయినప్పటికీ, నాని మాత్రం ఊరుకోలేదు. సోమవారం వెంకన్న చేసిన ట్వీట్ కు తాజాగా నాని సమాధానం చెప్పారు. దివంగత లోక్ సభ స్పీకర్ జీఎంసీ బాలయోగి ఆస్తులు తాను కొట్టేయడం నిజమేనన్నారు. ‘‘నేను బాలయోగి ఆస్తులు కాజేశనని ఒక్క ప్రబుద్ధుడు చెప్పింది యదార్థం. బాలయోగి కి ఉన్న ఆస్తులు నీతి,నిజాయితీ, విలువలు, సిద్ధాంతాలు ప్రజల్ల పట్ల అంకితభావం, ప్రాంతాన్ని అభివృద్ధి చేసే చిత్తశుద్ధి.. వీటిని కాజేసి పాటిస్తునందుకు చాలా గర్వ పడుతున్నాను’’ అని ట్వీట్ చేశారు.

‘‘దళిత నాయకుడు మాజీ స్పీకర్ బాలయోగి ఆస్తులన్నీ కాజేసిన దొంగ ఎవరో దేశం మొత్తానికి తెలుసు. ఒకే నంబర్ పై దొంగ పర్మిట్లతో బస్సులు నడిపిన దొంగవి నువ్వే కదా? నేను చెప్పాల్సిన నిజాలు చాలా ఉన్నాయి వినే ధైర్యం నీకుందా’’ అంటూ బుద్ధా వెంకన్న చేసిన ట్వీట్ కు నాని ఇలా సమాధానమిచ్చారు.

మొన్నటివరకు కలిసి తిరిగి ఈ నేతలిద్దరూ ఒక్కసారిగా ట్విట్టర్ వేదికగా రచ్చకెక్కి తమ పరువు తీసుకోవడంతోపాటు పార్టీ పరువు కూడా తీస్తున్నారంటూ తెలుగుదేశం పార్టీ శ్రేణులు ఆందోళనకు గురయ్యాయి. ఇరువురి మధ్య సమస్యలు ఏమైనా ఉంటే అధినేత సమక్షంలో కూర్చుని పరిష్కరించుకోవాలి గానీ, ఇలా వీధికెక్కి తీవ్ర పదజాలంతో ఒకరిపై మరొకరు విరుచుకుపడటం మంచిది కాదనే అభిప్రాయాలు వినిపించాయి.

ఈ నేపథ్యంలో పార్టీ అధినేత చంద్రబాబుపై గౌరవంతో తాను ఇకపై ఎలాంటి ట్వీట్లు చేయనని బుద్ధా వెంకన్న స్పష్టంచేసి, ట్వీట్లు చేయడం ఆపేశారు. కానీ నాని మాత్రం బుద్దా వెంకన్న ట్వీట్ కు కౌంటర్ గా తాజాగా ట్వీట్ చేశారు. అయితే, వెంకన్న ఇక ట్వీట్లు చేయనని చెప్పడంతో ఈ వార్ ఇక ముగిసినట్టుగానే అని భావిస్తున్నారు.