రూ.200 అప్పు తీర్చడానికి 5వేల కిలోమీటర్లు వచ్చాడు!

ఆయన ఓ కిరాణా షాపులో రూ.200 బాకీ ఉన్నాడు. కానీ ఆ అప్పు చెల్లించకుండానే తన దేశం వెళ్లిపోయాడు. 20 ఏళ్లు గడిచిపోయాయి. కాలక్రమంలో తమ దేశంలో ఎంపీ అయ్యాడు. ఎన్నో పనులు, మరెన్నో కార్యక్రమాలు.. అయినా 20 ఏళ్ల క్రితంనాటి రూ.200 అప్పును మరచిపోలేదు. ఆ అప్పు తీర్చడం కోసమే ఏకంగా 5 వేల కిలోమీటర్లు ప్రయాణించి వచ్చి మరీ ఆ షాపు యజమానుల ఇంటికి వెళ్లాడు. విషయం తెలిసి ఆశ్చర్యపోవడం వారి వంతైంది.

కెన్యా ఎంపీగా ఉన్న రిచర్డ్ న్యాగక టోంగీ మహారాష్ట్రలోని ఔరంగాబాద్ లో కొంతకాలం చదువుకున్నారు. ఆ సమయంలో ఆయన ఆర్థిక పరిస్థితి అంతంత మాత్రమే. ఈ నేపథ్యంలో స్థానిక వ్యాపారి గవాలీకి చెందిన కిరాణా దుకాణంలో నిత్యావసర వస్తువులు అరువుగా తీసుకెళ్లేవారు. ఈ క్రమంలో ఆయన బాకీ మొత్తం రూ.200కి చేరింది. అయితే, టోంగీ ఆ అప్పు తీర్చకుండానే స్వదేశానికి వెళ్లిపోయారు. ఇది జరిగి 20 ఏళ్లు అయింది.

టోంగీ కెన్యా లో రాజకీయంగా ఎదిగారు. ప్రస్తుతం ఎంపీగా ఉన్న ఆయన విదేశీ వ్యవహారాల శాఖలో ఓ విభాగానికి వైస్ చైర్మన్ గా ఉన్నారు. ఎంత బిజీగా ఉన్నప్పటికీ, తాను బకాయి పడ్డ రూ.200 మరిచిపోలేదు. దీంతో రెండు రోజుల క్రితం ఆయన సతీసమేతంగా ఔరంగాబాద్ వచ్చారు. తాను బకాయి పడ్డ గవాలీ ఇంటికి వెళ్లి, ఆయన కుమారుడికి రూ.200 అప్పు తిరిగి చెల్లించబోయారు. దీంతో వారు ఒక్కసారిగా భావోద్వేగానికి గురయ్యారు. ఎక్కడో 5వేల కిలోమీటర్ల దూరం నుంచి రూ.200 తీర్చడం కోసం ప్రత్యేకంగా వచ్చిన అతిథిని చూసి ఆనందం పట్టలేకపోయారు. ఆ డబ్బు తీసుకోవడానికి నిరాకరించి, ఆయనకు మంచి ఆతిథ్యం ఇచ్చారు. వారి మర్యాదలు చూసి టోంగీ కూడా భావోద్వేగానికి లోనయ్యారు.

అనంతరం మీడియాతో మాట్లాడుతూ.. తాను కష్టాల్లో ఉన్నప్పుడు గవాలీ కుటుంబం ఆదుకుందని, వారి అప్పు చెల్లించకుండా తమ దేశం వెళ్లిపోయినప్పటికీ, ఆ సంగతి తాను మరచిపోలేదన్నారు. అది తీర్చడం కోసమే ఇప్పుడు వచ్చానని, వారు తనను ఎంతో ఆప్యాయంగా ఆదరించి చక్కని ఆతిథ్యం ఇచ్చారని, తాను వారిని ఎప్పటికీ మరచిపోలేనని, గవాలీ కుటుంబంతో స్నేహసంబంధాలు కొనసాగిస్తానని చెప్పారు.