జగన్‌ వర్సెస్‌ చంద్రబాబు: ‘వైట్‌ పేపర్‌’ రాజకీయం

శ్వేత పత్రం.. అంటే, తెల్ల కాగితం.. అదేనండీ వైట్‌ పేపర్‌.. మామూలుగా అయితే, ఈ తెల్ల కాగితానికి పెద్దగా విలువ లేదు. కానీ, రాజకీయాల్లో తెల్ల కాగితానికి చాలా ఎక్కువ విలువ వుంటుంది. నిజానికి, శ్వేతపత్రం.. అంటే రాజకీయాల్లో అర్థం వేరు. అసత్యాలకు తావు లేకుండా, నిజాల్ని పేర్కొనడమే ఈ శ్వేతపత్రం తాలూకు ఉద్దేశ్యం. ‘దమ్ముంటే శ్వేతపత్రం విడుదల చేయాలి’ అంటూ రాజకీయాల్లో అధికార పార్టీని డిమాండ్‌ చేయని విపక్షమంటూ వుండదు.

చిత్రమేంటంటే, ఇప్పుడు అధికార పార్టీ శ్వేతపత్రం విడుదల చేస్తామంటోంటే, ప్రతిపక్షం ఆందోళన చెందుతోంది. ఒకప్పుడు శ్వేతపత్రం విడుదల చేయాలంటే, అధికార పార్టీలకు వెన్నులో వణుకు పుట్టేది. కానీ, ఇప్పుడు ఆ టెన్షన్‌ లేదు. ఎందుకంటే, శ్వేతపత్రాల్లో నిజాలు వుండడం లేదు గనుక. ఉమ్మడి తెలుగు రాష్ట్రం విడిపోయాక, 13 జిల్లాల ఆంధ్రప్రదేశ్‌కి ముఖ్యమంత్రి అవుతూనే చంద్రబాబు, వరుసగా శ్వేతపత్రాల్ని విడుదల చేశారు. ఇప్పుడు అదే పని, కొత్త ముఖ్యమంత్రి వైఎస్‌ జగన్‌మోహన్‌రెడ్డి చేస్తున్నారు.

అప్పట్లో శ్వేతపత్రాల్ని చెత్త పత్రాలుగా అభివర్ణించిన వైఎస్‌ జగన్‌, తాము చెప్పబోయేవన్నీ నిజాలేనంటున్నారు. నమ్మినోడికి నమ్మినంత.. అంతే తప్ప, అంతకు మించి శ్వేతపత్రాల్లో వాస్తవాలు వుంటాయని మనం ఆశించగలమా.? అవకాశమే లేదు. ఇక, జగన్‌ ప్రభుత్వం విడుదల చేస్తామంటోన్న శ్వేతపత్రాల్ని ఆహ్వానిస్తామంటూనే, వాటికి కౌంటర్‌గా తెలుగుదేశం పార్టీ తమకు తోచిన రీతిలో శ్వేతపత్రాల్ని విడుదల చేయబోతోందట. ఇది ఇంకా పెద్ద కామెడీ.

ఎవరి గోల వారిది. సాయంత్రం 4 గంటల సమయంలో ఆర్థిక మంత్రి బుగ్గన రాజేంద్రనాథ్‌ తొలి శ్వేతపత్రం విడుదల చేస్తారట. ఈరోజే చంద్రబాబుగానీ, లేదంటే.. మాజీ మంత్రి యనమల రామకృష్ణుడుగానీ ఓ శ్వేతపత్రం విడుదల చేసే అవకాశం వుందని తెలుస్తోంది. ఎలాగూ నిజాలు చెప్పాల్సిన పనిలేదు గనుక, ఎవరు చెప్పే కథలు వారు శ్వేతపత్రాల్లో చెప్పేస్తారు. అయినా, ఈ శ్వేతపత్రాలతో ఎవరికి ఉపయోగం.?