సిగ్గులేని రాత: చంద్రబాబు ప్రభుత్వమేంటి.? జగన్ ప్రభుత్వమేంటి.?

చంద్రబాబు హయాంలో.. వైఎస్ జగన్ హయాంలో.. అనాల్సింది పోయి.. చంద్రబాబు ప్రభుత్వం, వైఎస్ జగన్ ప్రభుత్వం.. అనే స్థాయికి జర్నలిజం ఏనాడో దిగజారిపోయింది. తప్పనిసరి పరిస్థితుల్లో అందరూ ఆ విధానాన్నే ఫాలో అవ్వాల్సి వస్తోందనుకోండి.. అది వేరే సంగతి.

చంద్రబాబు నియోజకవర్గంలో ఓ స్కూలుని వైఎస్ జగన్ ప్రభుత్వం తీర్చిదిద్దలేదా.? అంటూ అత్యంత అమాయకంగా ఓ సీనియర్ జర్నలిస్టు ప్రశ్నించేస్తే, అమాయకపు బులుగు కార్మికులు దాన్ని సోషల్ మీడియాలో నిస్సిగ్గుగా ప్రచారం చేసుకుంటున్నారు.

అప్పుడు చంద్రబాబు కావొచ్చు, ఇప్పుడు వైఎస్ జగన్ కావొచ్చు.. తమ తమ పాలనలో ప్రజల కోసం ఏం చేసినా, అది ప్రజల సొమ్ము నుంచి చేసిందే తప్ప, సొంత జేబుల్లోంచి తీసి ఇచ్చింది కానే కాదు. సాధారణ ప్రజానీకానికి ఈ విషయమై స్పష్టత లేదా.? లేదంటే, పచ్చ కార్మికులు అలాగే బులుగు కార్మికులు ప్రజల్ని ఏమార్చుతున్నారా.? అన్నదానిపై చర్చ జరిగి తీరాలి.

చంద్రబాబు సొంత నియోజకవర్గం కుప్పం అయినంతమాత్రాన, వైసీపీ అధికారంలో వుంటే.. ఆ కుప్పంలో అభివృద్ధి కార్యక్రమాల్ని చేపట్టకుండా వుండలేదు కదా.? అదే సూత్రం చంద్రబాబు పాలనకీ వర్తిస్తుంది. ఎవరు అధికారంలో వున్నా, ప్రభుత్వ ఖజానా నుంచే అభివృద్ధి, సంక్షేమ పథకాలకు నిధులు వెచ్చించాల్సి వుంటుంది.

ప్రభుత్వాలు అప్పులు చేస్తే, ఆ అప్పులు తీర్చేది ప్రజలే తప్ప చంద్రబాబుగానీ, వైఎస్ జగన్ గానీ తీర్చరు. మరెందుకు ఆయా సంక్షేమ పథకాలకి ఆయా నేతల పేర్లు, ఫొటోలు పెట్టుకుంటారా.? అంటే, అదే ప్రజాస్వామ్యంలో వింత పోకడ. దీన్ని పబ్లిసిటీ పైత్యం అనాలా.? అంతకు మించిన పెద్ద పదం ఇంకేన్నా వాడాలా.?

రాష్ట్ర ముఖ్యమంత్రిగా రాష్ట్రంలో అన్ని ప్రాంతాల్ని సమానంగా చూడటం అధికారంలో ఎవరున్నా వారు చేయాల్సిన పని. ఆ పని చేసినందుకు ప్రత్యేకమైన భజన ఎందుకు.? మరీ మీడియా ఇంతలా దిగజారిపోవాలా.? పైగా, ఒకప్పుడు చంద్రబాబు భజనలో మునిగి తేలు, ఇప్పుడు బులుగు రంగు ఒంటికి పులుముకున్న ఓ ‘మతిలేని’ సీనియర్ జర్నలిస్టు.. ‘కుప్పంలో వైఎస్ జగన్, స్కూలు తీర్చిదిద్దారు తెలుసా.?’ అంటూ అధికార పార్టీ అనుకూల మీడియాలో కాలమ్ రాయడం దిగజారిపోయిన పాత్రికేయ విలువలకు నిలువెత్తు నిదర్శనం.