Jeevitha: రామ్ గోపాల్ వర్మ (Ram Gopal Varma) తెరకెక్కించిన ‘వ్యూహం’ (vyuham) సినిమా విడుదలకు ముందే వివాదాలకు తావిస్తోంది. సినిమాను నవంబర్ 10న విడుదల చేసేందుకు నిర్ణయించడంతో సెన్సార్ కు వెళ్లారు. అయితే.. సినిమా రాజకీయ వివాదాలు సృష్టించే అవకాశం ఉందని.. రివ్యూ కమిటీకి వెళ్లాలని బోర్డు సూచించింది.
అయితే.. ఆర్సీలో జీవిత (Jeevitha) రాజశేఖర్ సభ్యురాలిగా ఉన్నారు. దీంతో ఆమె వైసీపీకి అనుకూలం కావడంతో సినిమాకు అనుమతులు వస్తాయనే వార్తలు వైరల్ అయ్యాయి. వీటికి ఆమె వైసీపీ కండువా కప్పుకున్న ఫోటోలు కూడా ప్రత్యక్షం అయ్యాయి. దీంతో ఈ అంశం మరింతగా వార్తల్లో నిలుస్తోంది. దీనిపై ఆమె స్పందించారు.
‘నాకు వైసీపీతో ఎటువంటి సంబంధం లేదు. నేను బీజేపీతోనే ఉన్నాను. మీడియాలో నేను వైసీపీ కండువా కప్పుకున్న ఫొటోలు అన్నీ పాతవే. అయినా.. ఇప్పుడు నా గురించి కొందరు ఎందుకు మాట్లాడుతున్నట్టు..? వ్యూహం సినిమా ఆర్సీకి వస్తే అన్ని సినిమాలు చూసినట్టే చూస్తా. అయితే.. ఆఫీస్ నుంచి నాకింకా ఎటువంటి సమాచారం లేద’ని అన్నారు.