చెవిరెడ్డీ.. చీవాట్లు గట్టిగానే పడ్డాయటగా.!

వైసీపీ నేత చెవిరెడ్డి భాస్కర్‌రెడ్డి సోషల్‌ మీడియా పేజ్‌లో, సినీ నటుడు మెగాస్టార్‌ చిరంజీవికి వ్యతిరేకంగా పోస్టింగ్‌ పడింది. దాంతో, మెగా ఫ్యాన్స్‌ తమ సత్తా చూపించేశారు. అప్పుడెప్పుడో వైఎస్‌ జగన్‌ అక్రమాస్తుల కేసులో అరెస్ట్‌ అయినప్పుడు, ‘చట్టం తన పని తాను చేసింది..’ అని మెగా పవర్‌ స్టార్‌ రామ్‌చరణ్‌ వ్యాఖ్యానించడాన్ని ఇప్పుడు చెవిరెడ్డి ప్రస్తావిస్తూ, ‘తండ్రీ కొడుకులు జగన్‌ అపాయింట్‌మెంట్‌ కోసం పడిగాపులు పడ్డారు.. ఓడలు బండ్లు అవడం అంటే ఇదే..’ అని సెలవిచ్చారు.

ఎలాగైతేనేం, మెగా ఫ్యాన్స్‌ దెబ్బకి చెవిరెడ్డి మాట మార్చేశారు. తనకు ఎలాంటి సోషల్‌ మీడియా అకౌంట్స్‌ లేవనీ, తాను చిరంజీవికి వ్యతిరేకంగా ఎలాంటి కామెంట్స్‌ చేయలేదని సెలవిచ్చారు. అవునా.? అలాగైతే, ‘చెవిరెడ్డి టీమ్‌’ పేరుతో సోషల్‌ మీడియాలో ‘అఫీషియల్‌’ పేజ్‌ నడుపుతున్నదెవరు.? ఈ ప్రశ్నకు చెవిరెడ్డి దగ్గర సమాధానం లేదు. మరోపక్క, చెవిరెడ్డి వ్యవహారంపై పార్టీలో తీవ్రమైన చర్చ జరిగగిందనీ, వ్యవహారం అధినేత వైఎస్‌ జగన్‌ వద్దకు వెళ్ళిందనీ, ‘సైరా నరసింహారెడ్డి’ పబ్లిసిటీ కోసం చాలా కష్టపడ్డామనీ, చెవిరెడ్డి మొత్త వ్యవహారాన్ని నాశనం చేసేశారనీ ఈ వ్యవహారంపై జగన్‌ కూడా ఆగ్రహం వ్యక్తం చేస్తూ, చెవిరెడ్డికి చీవాట్లు పడ్డాయనీ రాజకీయ వర్గాల్లో గుసగుసలు విన్పిస్తున్నాయి. జగన్‌ ఆదేశంతోనే, చెవిరెడ్డి వివరణ ఇచ్చారట. ‘

చిరంజీవితో సన్నిహిత సంబంధాలే వున్నాయి.. నేను జగన్‌ మనిషిని..’ అంటూ చెవిరెడ్డి వివరణ ఇచ్చుకోవాల్సి వచ్చింది. అక్రమాస్తుల కేసులో వైఎస్‌ జగన్‌ ఇప్పటికీ నిందితుడే. ఆయన బెయిల్‌ మీదనే వున్నారు. ఆయనే కాదు, విజయసాయిరెడ్డిది కూడా ఇదే పరిస్థితి. ‘వ్యక్తిగత హాజరు మినహాయింపు..’ కోరుతూ న్యాయస్థానానికి ఇటీవలే వైఎస్‌ జగన్‌ మొరపెట్టుకున్న విషయం విదితమే. అలాంటప్పుడు, అప్పట్లో చరణ్‌ చేసిన వ్యాఖ్యల్లో తప్పేముంది.? చెవిరెడ్డి మాట జారిన మాట వాస్తవం.. ఆయనకు చీవాట్లు పడటం కూడా వాస్తవమే అయి వుండొచ్చు. లేకపోతే, ఇంతలోనే అంత మార్పు ఎలా సాధ్యం.?