చంద్రబాబుకు తత్వం బోధపడింది

అనుభవం అయితే గానీ తత్వం బోధపడదంటారు. ఈ సామెత ఇప్పుడు టీడీపీ అధినేత చంద్రబాబుకు సరిగ్గా సరిపోతుంది. ఎన్నికల ముందు బీజేపీతో విభేదించి బయటకు రావాలన్న ఆయన నిర్ణయం ఎంత తప్పో ఇప్పటికి తెలుసుకున్నారు. వాస్తవానికి ఎన్నికల సమయంలోనే తెలిసినా.. ఇప్పుడు బయట పడ్డారు. కేంద్రంతో విభేదించి నష్టపోయామని పేర్కొన్నారు. ప్రజలనే నమ్ముకున్నామని, ప్రయోజనం పొందినవారు సహకరించలేదని నిట్టూర్పులు విడిచారు.

వైఎస్ ను ఢీకొట్టి రెండు సార్లు ఓటమి చవిచూసిన చంద్రబాబు.. రాష్ట్ర విభజన నేపథ్యంలో నవ్యాంధ్ర తొలి సీఎంగా పగ్గాలు అందుకున్నారు. కొత్త రాష్ట్రానికి అనుభవంతుడైన నాయకుడు అవసరమని జనం భావించడం.. జగన్ పై కేసులు ఉండటం.. మోదీ హవా ఉన్న సమయంలో తెలివిగా బీజేపీతో జట్టుకట్టడం, రుణమాఫీ హామీ ఇవ్వడంతో 2014 ఎన్నికల్లో బాబుపై ఓట్ల వర్షం కురిసింది. అప్పటివరకు జగన్ గెలుపు ఖాయమని అందరూ అనుకున్నా అనూహ్యంగా చివరి మూడు నెలల్లో సమీకరణాలు మారిపోయి, బాబుకు అనుకూల వాతావరణం ఏర్పడి ఆయన గద్దెనెక్కారు.

అయితే, ఐదేళ్ల పాలనలో వ్యతిరేకత ప్రబలింది. ఇచ్చిన హామీలను సరిగా నెరవేర్చకపోవడం, రాజధాని నిర్మాణంలో అనుసరించిన వైఖరి తదితరాలతో వ్యతిరేక పెరిగింది. ఇది గమనించిన చంద్రబాబు.. నెపాన్ని బీజేపీపైకి నెట్టి తాను తప్పించుకోవాలని చూశారు. అందుకు అనుగుణంగానే కేంద్రంలో బీజేపీ నుంచి బయటకు వచ్చారు. అదే ఆయన తీసుకున్న పొరపాటు నిర్ణయమని ఎన్నికలు సమీపిస్తున్న కొద్దీ అర్థమైంది. వాస్తవానికి బీజేపీ నుంచి వీడి రావడం సరైన నిర్ణయం కాదని పార్టీలోని పలువురు సీనియర్లు చెప్పినా చంద్రబాబు వినలేదు.

ప్రత్యేక హోదా ఆకాంక్ష జనాల్లో బలంగా ఉన్నందున బీజేపీ నుంచి బయటకు వచ్చి ఆ పార్టీపై విమర్శలు చేయడం సరైన వ్యూహమని ఆయన భావించారు. ఈ క్రమంలో ప్రధాని మోదీపై తీవ్రంగా విరుచుకుపడ్డారు. అయితే, దేశవ్యాప్తంగా మోదీ హవా ఏమాత్రం తగ్గకపోవడం బాబుకు ప్రతికూలంగా మారింది. ఏపీలో బీజేపీపై వ్యతిరేకత ఉన్నా.. అది టీడీపీకి అనుకూలంగా మారలేదు. దీంతో బాబు పరిస్థితి రెంటికీ చెడ్డ రేవడిలా తయారైంది. ఇక్కడ అధికారమూ పోయింది. అక్కడ కేంద్రంలో అధికారంలో ఉన్న బీజేపీతో దూరమూ పెరిగిపోయింది. ఆ విషయాలన్నీ విశ్లేషించుకునే ఇప్పుడు ఆయన తీవ్రంగా మథనపడుతున్నారు. అదే విషయాన్ని కార్యకర్తలతో సమావేశంలో చెప్పి బాధపడ్డారు.