జగన్‌ సారూ.. ప్రశ్నిస్తే పాతరేస్తారా.?

ప్రజాస్వామ్యంలో ప్రశ్నించే గొంతుకలు ఖచ్చితంగా వుండి తీరాల్సిందే. రాజకీయ పార్టీలకు మీడియా సంస్థలు బాకా ఊదుతున్నాయి కాబట్టే.. వాస్తవాల్ని వెలుగులోకి తెచ్చేందుకు సోషల్‌ మీడియాలో సామాన్యులు యాక్టివ్‌ అవుతున్నారు. అదే సమయంలో, మీడియా ఎలాగైతే భ్రష్టుపట్టిపోయిందో సోషల్‌ మీడియాలోనూ ‘చెడు వార్తలు’ అలాగే పెరిగిపోయాయి. మీడియా భ్రష్టుపట్టిపోయింది గనుక.. దాన్ని బ్యాన్‌ చేసెయ్యలేదు కదా.! సోషల్‌ మీడియా కూడా అంతే. అన్నిట్లోనూ మంచి, చెడు వుంటాయి.. వుండి తీరతాయి కూడా.

మీడియాలో ప్రభుత్వానికి వ్యతిరేకంగా వార్తలొస్తే, ఉక్కుపాదంతో అణిచిపెట్టేసే దిశగా వైఎస్‌ జగన్‌ సర్కార్‌ అడుగులు వేస్తోంది. ప్రభుత్వ వ్యతిరేక కథనాలపై న్యాయ పరమైన చర్యల తీసుకునే దిశగా క్యాబినెట్‌ పలు నిర్ణయాలు తీసుకుంది. అంటే, ఇకపై ప్రభుత్వానికి వ్యతిరేకంగా ఏదన్నా కథనం వస్తే.. అంతే సంగతులన్నమాట. ఇది సాధ్యమయ్యే పనేనా.? గతంలో తెలంగాణ ప్రభుత్వం రెండు న్యూస్‌ ఛానల్స్‌పై అనధికారిక వేటు వేసింది. ఆ తర్వాత ఆ ఛానెల్స్‌ పునరుద్ధరణ జరిగింది.

ఆంధ్రప్రదేశ్‌లోనూ ఇప్పుడు రెండు ఛానళ్ళపై అనధికారిక వేటు కొనసాగుతోంది. ఇది ఖచ్చితంగా అధికార పైత్యమే. ఇందులో ఇంకో మాటకు తావు లేదు. ప్రభుత్వంపై వచ్చే విమర్శల్ని సహించలేకపోతే.. అదసలు ప్రజాస్వామ్యమే కాదు. రాజకీయ పార్టీల్లో జరిగే పరిణామాల గురించి ఊహాగానాలు రావడం సహజమే. ప్రభుత్వాలకు సంబంధించి కూడా ఊహాగానాలు వస్తుంటాయి.

చాలా సందర్భాల్లో ఆ ఊహాగానాలు నిజమవుతాయి కూడా. అధికార పార్టీ నేతల ఆగడాలు సర్వసాధారణం. వాటిని వెలుగులోకి తెచ్చినప్పుడు, ప్రభుత్వ వ్యతిరేక చర్య.. అని అనగలమా.? అధికార పీఠమెక్కుతూనే ప్రజాస్వామ్యం గురించి నీతుల్ని ఘనంగా చెప్పే పాలకులు, ఆ ప్రజాస్వామ్యానికి మూల స్థంబాల్లో ఒకటైన ప్రశ్నించే గొంతుకని మాత్రం తొక్కి పెట్టేయాలనుకుంటారు. ఇదెక్కడి చోద్యం.? తమ వైఫల్యాల్ని ఎవరైనా ఎత్తి చూపితే తట్టుకోలేని పాలకులు అసలు పాలకులుగా వుండడానికే అనర్హులు.