ప్రధాని ఆశీస్సులతో.. వైఎస్‌ జగన్‌ ప్రభుత్వానికి చేవ లేదా.?

పోలవరం ప్రాజెక్టు విషయంలో రివర్స్‌ టెండరింగ్‌పై కేంద్రం ఆగ్రహం వ్యక్తం చేస్తోన్న విషయం విదితమే. రాజధాని అమరావతిని మార్చాలన్న వైసీపీ ప్రభుత్వ ఆలోచననీ కేంద్రం తప్పుపడుతోంది. విద్యుత్‌ ఒప్పందాల విషయంలో రాష్ట్ర ప్రభుత్వ సమీక్షలపైనా కేంద్రం గుస్సా అవుతోంది. ఓ పక్క ఇవన్నీ సంచలన నిర్ణయాలంటూ వైఎస్సార్‌ కాంగ్రెస్‌ ప్రభుత్వం ఘనంగా చెప్పుకుంటోంటే, ఇంకోపక్క ‘అబ్బే.. మాకు అంత సీన్‌ లేదు.. ప్రధాని మోడీ, కేంద్ర హోంమంత్రి అమిత్‌ షా ఆశీస్సులతోనే అన్నీ జరుగుతున్నాయ్‌..’ అంటూ సాక్షాత్తూ వైఎస్సార్సీపీలో నెంబర్‌ టూ అయిన విజయసాయిరెడ్డి తమ ప్రభుత్వ ‘గాలి’ తీసేశారు.

ఇక్కడ విజయసాయిరెడ్డి వ్యాఖ్యల్లో ఒక విషయం స్పష్టమవుతోంది. రాష్ట్ర ప్రభుత్వానికి ‘అంత సీన్‌’ లేదు అని. తమ తుగ్లక్‌ చర్యల్ని సమర్థించుకోవడానికి ‘కేంద్రం ఆశీస్సులు’ అని విజయసాయిరెడ్డి ముసుగేయడం వైఎస్సార్సీపీ శ్రేణుల్ని సైతం విస్మయానికి గురిచేస్తోంది. వైఎస్సార్సీపీలో సమ్‌థింగ్‌ ఏదో ‘తేడా’గా జరుగుతున్న మాట వాస్తవం. లేకపోతే, కోడెల శివప్రసాద్‌ ఎపిసోడ్‌లో, వైసీపీ ఎంపీ రఘురామకృష్ణంరాజు ఓ ఛానల్‌ చర్చాకార్యక్రమం సందర్భంగా మాట్లాడుతూ, కోడెలకు క్లీన్‌ సర్టిఫికెట్‌ ఇవ్వడమేంటి.? రాజధాని అమరావతి విషయంలో మంత్రి బొత్స సత్యనారాయణ వ్యాఖ్యల్ని ‘నేను సమర్థించలేను, ఖండించలేను..’ అంటూ మరో మంత్రి అవంతి శ్రీనివాస్‌ ఎద్దేవా చేయడమేంటి.? తాజాగా, విజయసాయిరెడ్డి తమ ప్రభుత్వం ‘ఘనతల్ని’ కేంద్రం ఖాతాలో వేసెయ్యడమేంటి.?

విజయసాయిరెడ్డి చెబుతున్న మాటల్లో అస్సలేమాత్రం వాస్తవం లేదని తాజాగా కన్నా లక్ష్మినారాయణ తేల్చేశారు. ‘చంద్రబాబు ప్రభుత్వం కేంద్రం ఇచ్చిన లెక్కలు చెప్పకుండా, కేంద్రాన్ని దోషిగా చూపే ప్రయత్నం చేసింది.. ఇప్పుడు అచ్చం అలాంటి పనే వైసీపీ కూడా ప్రారంభించింది..’ అంటూ కన్నా లక్ష్మినారాయణ మండిపడ్డారు. ఒక్కటి మాత్రం నిజం, విజయసాయిరెడ్డి.. కేంద్రానికి ‘బాకా’ ఊదడంలో సిద్ధహస్తుడు. మరీ, వైఎస్‌ జగన్‌ ఇమేజ్‌ని సైతం దిగజార్చేలా కేంద్రానికి ఆయన ‘బాకా ఊదడం’ ఎంతవరకు సబబు.? అన్నదే ఇక్కడ అసలు చర్చ.