ఫలిస్తున్న జగన్ ఢిల్లీ టూర్: ప్రత్యేక హోదా వచ్చేస్తోందా.?

కలిసొచ్చే అంశమేదన్నా వుందంటే, దానికి తమ ‘పేరు’ తగిలించేసుకోవడం అధికారంలో వున్నవారికి సర్వసాధారణమే. ఏదన్నా తేడా కొడితే మాత్రం, ‘మా ప్రయత్నం మేం చేశాం..’ అంటూ సన్నాయి నొక్కులు నొక్కడం కూడా మామూలే.

ముఖ్యమంత్రి వైఎస్ జగన్ మోహన్ రెడ్డి ఇటీవల ఢిల్లీకి వెళ్ళి వచ్చారు. ప్రధాని సహా పలువురు కేంద్ర మంత్రులతో భేటీ అయ్యారు. ఆంధ్రప్రదేశ్ రాష్ట్ర సమస్యలపై కేంద్రం ప్రభుత్వ పెద్దల వద్ద మొరపెట్టుకున్నారట. మొరపెట్టుకున్నారో, విజ్ఞప్తులే చేశారో.. సొంత ప్రయోజనాల కోసమే ఢిల్లీకి వెళ్ళారో.. అన్న విపక్షాల విమర్శలు మామూలేననుకోండి.. అది వేరే సంగతి.

కేంద్రం, దేశంలోని వివిధ రాష్ట్రాలకు ఇటీవల నిధులు విడుదల చేసింది.. అందులో ఆంధ్రప్రదేశ్ రాష్ట్రానికి సంబంధించిన వాటా కూడా వుంది. ‘అదిగో.. జగన్ ఢిల్లీ టూర్ ఫలాలు..’ అంటూ బులుగు మీడియా గొంతు చించుకుంటోందిప్పుడు.

నిజానికి, సీఎం వైఎస్ జగన్ ఢిల్లీ టూర్ ప్రధాన ఎజెండాలో ప్రత్యేక హోదా సహా చాలా అంశాలు. ప్రత్యేక హోదాపై కేంద్రం ససేమిరా అంటోంది. విశాఖ రైల్వే జోన్ సంగతి తేల్చడంలేదు. దుగరాజపట్నం పోర్టూ లేదు, కడప స్టీలు ప్లాంటూ లేదు. చెప్పుకుంటూ పోతే, విభజన హామీల లిస్టే చాంతాడంత వుంటుంది. కొత్త వ్యవహారాలు ఈ లిస్టుకి అదనం. అందులో విశాఖ స్టీలు ప్లాంటు ప్రైవేటీకరణ వ్యవహారమొకటి.

ముఖ్యమంత్రి వైఎస్ జగన్ ఢిల్లీ టూర్ గనుక విజయవంతమైతే, ముఖ్యమంత్రితోపాటు కేంద్ర మంత్రులెవరో ఒకరు మీడియా ముందుకు వచ్చేవారే. ఆ టూర్ సత్ఫలితాలనిస్తోంటే, కేంద్ర మంత్రులు రాష్ట్రానికి వచ్చి.. కనీసం బీజేపీ నేతలతో అయినా సన్మానాలు చేయించుకునేవారే.

పోలవరం ప్రాజెక్టుకి సంబంధించి కేంద్రం విడుదల చేయాల్సిన బిల్లులు కూడా సకాలంలో విడుదల కావడంలేదాయె. అయినా, ముఖ్యమంత్రి ఢిల్లీ టూర్ విజయవంతమట. ఇదిగో, ఇలాంటి బులుగు ప్రచారాల వల్లే రాష్ట్ర భవిష్యత్తు అయోమయంలో పడింది. అప్పట్లో పచ్చ ప్రచారం, ఇప్పుడు బులుగు ప్రచారం.. రెండిటికీ పెద్దగా తేడాల్లేవు.