మేఘాపై కొనసాగుతున్న ఐటీ దాడులు: మేటర్‌ సీరియస్సేనట.!

మేఘా సంస్థ తెలుగు రాష్ట్రాల్లోనే కాక దేశవ్యాప్తంగా అనేక ప్రతిష్టాత్మక ప్రాజెక్టులు చేపడుతోంది. అలాంటి సంస్థపై ఐటీ దాడులు ఇప్పుడు సర్వత్రా చర్చనీయాంశమవుతున్నాయి. ఒక రోజు కాదు, రెండు రోజులు కాదు.. ఐదు రోజులుగా ఐటీ సోదాలు మేఘా సంస్థపై జరుగుతున్నా.. తెలుగు మీడియా మాత్రం వ్యవహారాన్ని చాలా ‘తక్కువ స్థాయిలోనే’ ప్రొజెక్ట్‌ చేస్తోంది. అదే, ఇంకేదన్నా సంస్థ మీద ఇలాంటి ఐటీ దాడులు జరిగితే.. ఆ రచ్చ మామూలుగా వుండేది కాదు.

సోదాల్లో కొన్ని కీలక పత్రాల్ని అధికారులు స్వాధీనం చేసుకున్నారనీ, వాటి ఆధారంగా మరికొన్ని దాడుల్ని అధికారులు చేస్తున్నారనీ ప్రచారం జరుగుతోంది. ఈ ప్రచారంలో నిజమెంతోగానీ, తెలుగు రాష్ట్రాల్లోని అధికార పార్టీలకు మేఘా సంస్థ అత్యంత సన్నిహితంగా వ్యవహరిస్తోందనీ.. ఈ కారణంగానే మేఘా సంస్థపై ఐటీ దాడులు జరుగుతున్నాయనీ ఇంకో వాదన తెరపైకొచ్చింది.

ఇదిలా వుంటే, కాళేశ్వరం ప్రాజెక్టుకి సంబంధించి భారీయెత్తున ‘ప్రయోజనం’ మేఘా సంస్థకు జరిగిందనీ, పరస్పర సహకారం కింద ప్రభుత్వంలోని పెద్దలకూ ఆ మేలు జరిగిందనీ, మరోపక్క.. ఆంధ్రప్రదేశ్‌లోనూ ఇదే తరహా ‘మేలు’ కోసం స్కెచ్‌ నడిచిందనీ, ఈ నేపథ్యంలోనే అక్కడ రివర్స్‌ టెండరింగ్‌ జరుగుతోందనీ విపక్షాలు ఆరోపిస్తున్నాయి. ఆ ఆరోపణల్లో నిజాలు నిగ్గు తేల్చేందుకు కేంద్రం నడుం బిగించి, ఐటీ సోదాలకు గ్రీన్‌ సిగ్నల్‌ ఇచ్చినట్లు వార్తలొస్తుండడం గమనార్హం.

పెద్ద పెద్ద సంస్థలు అన్ని రాజకీయ పార్టీలకూ అత్యంత సన్నిహితంగానే వ్యవహరిస్తాయి. అయితే, ఇటీవలి కాలంలో ‘మార్పు’ స్పష్టంగా కన్పిస్తోంది. ఆయా సంస్థలు అధికార పార్టీలకు తొత్తుల్లా వ్యవహరిస్తుండడం గమనార్హం. అలా ప్రభుత్వానికి సన్నిహితంగా వుండే సంస్థలకు అదనపు ప్రయోజనాలే కాదు, నామినేటెడ్‌ పోస్టులు కూడా దక్కుతుండడం కొసమెరుపు. ఈ నేపథ్యంలోనే ఇప్పుడు ఎంపిక చేసిన కొన్ని సంస్థలు కేంద్రం ‘టార్గెట్‌’లోకి వచ్చాయని అనుకోవచ్చేమో.!