జగన్‌ – చిరంజీవి మీటింగ్‌: పవన్‌పై ఎఫెక్ట్‌ ఎంత.!

వైఎస్‌ జగన్‌ మోహన్‌రెడ్డితో మెగాస్టార్‌ చిరంజీవి సమావేశమయ్యాక.. మెగా అభిమానుల్లో పలు అంశాలపై ఆసక్తికరమైన చర్చలు జరుగుతున్నాయి. ప్రధానంగా పవన్‌ కళ్యాణ్‌ మళ్ళీ సినిమాల్లో నటించడం బెటర్‌.. అన్న అంశం చుట్టూ చర్చ జరుగుతోంది. రాజకీయాల్లో వున్నన్నాళ్ళూ చిరంజీవి చాలా చాలా విమర్శలు ఎదుర్కొన్నారు. చిరంజీవి వ్యక్తిగత జీవితం మీద అడ్డగోలు విమర్శలు చేశారు చాలామంది.

కానీ, ఇప్పుడు చిరంజీవి ‘అందరివాడు’ అయిపోయారు.. ఎందుకంటే, ఆయన రాజకీయాల్లో లేరు గనుక. అంటే, రాజకీయాల్లోకి రాగానే ‘బురద’ చల్లేయాల్సిందేనన్నమాట. పవన్‌ కళ్యాణ్‌ విషయంలో కూడా అదే జరుగుతోంది. ఒకవేళ పవన్‌ కళ్యాణ్‌ కూడా కొన్నాళ్ళపాటు రాజకీయాల్ని పక్కన పెట్టి సినిమాల్లోకి వెళితే.. ఆయన మళ్ళీ ‘అందరివాడు’ అయిపోవడం ఖాయం.. అన్నది కొందరి వాదన.

అయితే, పవన్‌ కళ్యాణ్‌ ఆలోచనలు వేరు.. చిరంజీవి ఆలోచనలు వేరు. పలువురు సినీ నిర్మాతలు, దర్శకులు పవన్‌ కళ్యాణ్‌తో సినిమాలు చేయాలనుకుంటున్న మాట వాస్తవం. కానీ, పవన్‌ కళ్యాణ్‌ రాజకీయాలపై ఖచ్చితమైన అవగాహనతో వున్నారు. వెన్నుపోటు రాజకీయాలు రాజ్యమేలుతున్న వేళ, ఎవరు తనను విడిచి పోతున్నా పవన్‌ కళ్యాణ్‌ పట్టించుకోవడంలేదు.

ఎందుకంటే, పవన్‌ కళ్యాణ్‌ వెంట లక్షలాదిమంది అభిమానులున్నారు. ఆ అభిమానుల లెక్కలు చాలా పక్కాగా వున్నాయి. పవన్‌ కళ్యాణ్‌ ఏ నిర్ణయం తీసుకున్నా తామంతా ఆయన వెన్నంటే వుంటామంటున్నారు. చిరంజీవి – జగన్‌ భేటీని కేవలం ‘సినిమా’ సంబంధిత వ్యవహారంగానే చూడాలన్నది మెగా అభిమానుల వాదన. మెగా అభిమానుల్లోనే భాగమైన పవన్‌ అభిమానులదీ ఇదే అభిప్రాయం.

పవన్‌ కళ్యాణ్‌తో తొలుత అన్ని విషయాలూ చర్చించి, ఆ తర్వాత జగన్‌తో భేటీని చిరంజీవి ఖరారు చేసుకున్నారంటేనే విషయం క్లియర్‌గా కన్పిస్తోంది. జగన్‌తో తన భేటీ, జనసేన పార్టీపై ఎలాంటి ప్రభావం చూపదన్న ఖచ్చితమైన అంచనాలు చిరంజీవికీ వున్నాయి. అయితే, ఈ భేటీ తర్వాత.. పవన్‌, సినిమాల్లో నటించడానికి కొంత మార్గం సుగమం అవుతుందనీ.. సినిమాల్లో నటించడం వల్ల అడ్వాంటేజ్‌ని చిరంజీవి స్వయంగా తన తమ్ముడికి ఈ భేటీతో తెలియజేశారనీ వ్యక్తమవుతున్న అభిప్రాయాల్ని ఎలా కాదనగలం.?