అదేంటో మెగా కాంపౌండ్‌ సినిమాలంటే వివాదాలు ఎగేసుకుంటూ వచ్చేస్తాయి. సుమారు 50 కోట్ల రూపాయల డిమాండ్‌తో కొందరు ఆందోళనకారులు కొద్ది రోజులగా ‘సైరా నరసింహారెడ్డి’పై వివాదాలు లేవనెత్తిన విషయం విదితమే. ఆ వివాదం ఎప్పటికప్పుడు కొత్త మలుపులు తిరుగుతూనే వుంది. ‘మొత్తం ఏడు కుటుంబాలు.. ఒక్కో కుటుంబానికీ 15 లక్షలు ఇస్తామని చెప్పారు.. అంటే కోటి రూపాయల ఐదు లక్షలు..’ అంటూ ఎవరైతే వివాదం రాజేశారో ఆ వ్యక్తులే ఇప్పుడు కొత్త పల్లవిని అందుకుంటున్నారు.
‘అసలు మా సినిమా బయోపిక్‌ కానే కాదు’ అని దర్శకుడు తేల్చేశాక, ‘గొడవ చేస్తోన్న’ వ్యక్తులు షాకయ్యారు. ‘ఉయ్యాలవాడ నరసింహారెడ్డి’ జీవిత చరిత్ర ఆధారంగా తెరకెక్కుతోన్న సినిమా ‘సైరా నరసింహారెడ్డి’. అయితే, బయోపిక్‌లా కాకుండా, నాటి స్వాతంత్య్ర పోరాటంలో వీరుల త్యాగాల్ని నేటి తరానికి గుర్తు చేసేలా దీన్నొక దేశభక్తి చిత్రంగా మాత్రమే తెరకెక్కించామన్నది చిత్ర దర్శక నిర్మాతల వెర్షన్‌. నిజానికి ఏ సినిమా విషయంలో అయినా, ‘కల్పితం..’ అనే ప్రస్తావన వస్తుంటుంది. ఆ లెక్కన, ‘రాయల్టీ’ వ్యవహారాలకు ఆస్కారమే వుండదన్నది చాలామంది అభిప్రాయం.
‘నిజానికి మేం ఎవర్నీ ఇబ్బంది పెట్టదలచుకోలేదు.. మమ్మల్ని పనిగట్టుకుని కొందరు ఇబ్బందులకు గురిచేస్తున్నారు. ఈ పరిస్థితుల్లో మేం చెయ్యగలింది ఇదే..’ అంటోంది సైరా టీమ్‌. ఎవరి వెర్షన్‌ వారిదే కావడంతో ఇందులో ఎవరిది తప్పు అని తేల్చడానికి వీల్లేని పరిస్థితి. వారసులనబడేవారు.. ఓ మహనీయుడి చరిత్ర ప్రపంచానికి తెలుస్తోందంటే సంతోషించాలి తప్ప, స్వాతంత్రోద్యమం కోసం ప్రాణాలర్పించిన వీరుడి చరిత్రను అమ్ముకోవాలనుకోకూడదు.
ఇక, ‘సైరా నరసింహారెడ్డి’ అంతిమంగా ఓ సినిమా. సినిమా అంటే వ్యాపారమే అయినా, ఈ సినిమా విషయంలో లాభాపేక్ష అన్న మాటకు తావు లేదన్నది చిత్ర దర్శక నిర్మాతల వాదన. ఈ వాదనలు ఇలా కొనసాగుతూనే వుంటాయ్‌.. సినిమా ప్రేక్షకుల ముందుకూ వచ్చేస్తుంది. సినిమా విడుదలయ్యాక అయినా వివాదాలు సద్దుమణుగుతాయా.? వేచి చూడాల్సిందే.
118277 256750Fantastic article mate, maintain the fantastic work, just shared this with ma friendz 400307