ఐపీఎల్‌ 2020 రివ్యూ: కొంచెం ఇష్టం కొంచెం కష్టం.!

ఐపీఎల్‌ 2020 ఎలా జరుగుతుంది.? అన్న సందేహాలు పటాపంచలయ్యాయి.. కరోనా నేపథ్యంలో వాయిదా పడ్డ ఐపీఎల్‌ 2020, ఇండియాలో కాకుండా యూఏఈలో షురూ అయ్యింది.. రోజులు గడిచిపోతున్నాయ్‌.. మ్యాచ్‌లు జరిగిపోతున్నాయ్‌.. కొన్ని జట్లు అదరగొట్టేస్తున్నాయ్‌.. కొన్ని జట్లు పేలవమైన ప్రదర్శనలిస్తున్నాయి. బౌలర్లు చెలరేగిపోతున్నారు.. బ్యాట్స్‌మెన్‌ అదరగొట్టేస్తున్నారు. ఫీల్డింగ్‌ విన్యాసాలూ దుమ్ము రేపేస్తున్నాయ్‌. కానీ, మైదానంలో క్రికెట్‌ అభిమానుల్లేరు. ఎవరైనాసరే, మ్యాచ్‌ని ఇంట్లోని స్క్రీన్స్‌ మీద చూడాల్సిందే.

గతంలో పరిస్థితి ఇందుకు పూర్తి భిన్నం. మైదానంలో వేలాదిమంది అభిమానులు, తమ అభిమాన జట్లకు అనుకూలంగా నినాదాలు చేసేవారు.. తమ తమ అభిమాన క్రికెటర్లను ఉత్సాహపరిచేవారు. ఇక, బిగ్‌ స్క్రీన్స్‌ ఎక్కడికక్కడ ఏర్పాటు చేసి, జనానికి ఎంటర్‌టైన్‌మెంట్‌ పంచేది ఐపీఎల్‌. వీటన్నిటికీ తోడుగా పబ్బులు, క్లబ్బుల్లోనూ ప్రత్యేక ప్రదర్శనలుండేవి. ఆ హంగమా అంతా ఇప్పుడు లేదు. గొప్ప విషయం ఏంటంటే, ఐపీఎల్‌ ప్రారంభమయ్యాక ఇప్పటిదాకా ఏ ఆటగాడూ కరోనా బారిన పడకపోవడం.

ఇలాగే ఈ సీజన్‌ అంతా ఎలాంటి కరోనా టెన్షన్లూ లేకుండా సజావుగా సాగాలన్నది సగటు క్రికెట్‌ అభిమాని కోరిక. చాలాకాలం తర్వాత ఎమ్మెస్‌ ధోనీని మైదానంలో చూస్తున్నాం. బ్యాటింగ్‌లో ఫెయిలవుతున్నా, ధోనీ ఓ మ్యాచ్‌లో వరుసగా బాదిన మూడు సిక్సర్లు అభిమానులకి బోల్డంత కిక్‌ ఇచ్చాయి. విరాట్‌ కోహ్లీ నుంచి మెరుపులు చూడాల్సి వుంది. ఆటగాళ్ళ ఆట తీరు సంగతి పక్కన పెడితే, సునీల్‌ గవాస్కర్‌ – కోహ్లీ – అనుష్క శర్మ వివాదం తారాస్థాయికి చేరింది.

మైదానంలో ఆటగాళ్ళు కొంత గాయాలపాలవుతున్నారు. అభిమానుల్లేకపోవడం వల్లేనేమో.. ఆటగాళ్ళు తొందరగా అలసిపోతున్న పరిస్థితిని చూస్తున్నాం. ఓవరాల్‌గా చూసుకుంటే, ఐపీఎల్‌ 2020 క్రికెట్‌ అభిమానులకు కాస్త ఊరటగా వుందే తప్ప.. ఓ స్థాయిలో అలరించేలా లేదని నిస్సందేహంగా చెప్పొచ్చు. నిజానికి, ఇప్పుడున్న ప్రత్యేక పరిస్థితుల్లో ఇదే చాలా ఎక్కువ. అన్‌ లాక్‌ 5 అక్టోబర్‌ 1 నుంచి షురూ కానున్న దరిమిలా, కొత్త వెసులుబాట్లతో ఐపీఎల్‌ అభిమానులకు ఇంకాస్త జోష్‌ వస్తుందేమో వేచి చూడాలిక.