ఇన్‌సైడ్‌ స్టోరీ: అప్పుల కుప్పగా మారుతోన్న ఆంధ్రప్రదేశ్‌.!

ఆంధ్రప్రదేశ్‌కి ఒకప్పుడు ‘అన్నపూర్ణ’ అనే గుర్తింపు వుండేది. కానీ, ఇకపై ‘అప్పుల కుప్ప’ అనాలేమో.! ఉమ్మడి తెలుగు రాష్ట్రం విభజనతో ఆంధ్రప్రదేశ్‌ తీవ్రంగా నష్టపోయింది. ఇప్పటికీ, ఆంధ్రప్రదేశ్‌ రాజధాని ఏది.? అన్న ప్రశ్నకు సరైన సమాధానం దొరకని పరిస్థితి. కారణం ఏదైనా, చంద్రబాబు హయాంలో రాజధానిగా ప్రకటితమైన అమరావతి, వైఎస్‌ జగన్‌ హయాంలో పూర్తి నిర్లక్ష్యానికి గురయ్యింది. అది ఆంధ్రప్రదేశ్‌ ఆర్థిక వ్యవస్థపైనా పెను ప్రభావం చూపుతోంది.

రాజధాని రాష్ట్ర ప్రజల ఆత్మగౌరవం. అదే సమయంలో, ఆ రాజధాని రాష్ట్రానికి ప్రధాన ఆదాయ వనరు.మూడు రాజధానులంటూ.. అధికార పక్షం ‘కాలయాపన’ చేస్తూ, అమరావతిని అటకెక్కించేసిందన్నదాంట్లో ఎవరికీ ఎలాంటి సందేహాల్లేవు. అసలే ఆర్థిక ఇబ్బందుల్లో వున్న రాష్ట్రానికి, కరోనా మహమ్మారి మరింతగా నష్టం చేసింది. ఆదాయం గణనీయంగా తగ్గిపోవడంతో, అప్పులు చేయక తప్పని పరిస్థితి.

రానున్న మూడు నెలల కోసం మరో 14 వేల కోట్ల రూపాయల అప్పు కోసం వైఎస్‌ జగన్‌ ప్రభుత్వం ప్రయత్నిస్తోందంటూ రాజకీయ వర్గాల్లో చర్చ జరుగుతోంది. ఈ అప్పు కోసం అప్పుడే ప్రతిపాదనలు కూడా ప్రభుత్వం నుంచి వెళ్ళాయట. నిజానికి, కేంద్రం నుంచి రావాల్సిన ప్రత్యేక హోదా, ప్రత్యేక ప్యాకేజీ.. వంటివి వచ్చి వుంటే, రాష్ట్రం ఈ స్థాయి ఆర్థిక ఇబ్బందుల్లో పడేది కాదు. కానీ, కేంద్రాన్ని ఆ విషయమై ప్రశ్నించేందుకు వైఎస్‌ జగన్‌ ప్రభుత్వం సాహసించడంలేదు.

మరోపక్క, చంద్రబాబు హయాంలో రాష్ట్రాన్ని అప్పుల కుప్పగా మార్చేశారనీ, ఆయా రంగాలకు బాకీలు పెట్టారనీ, ఆ బాకీల్ని తీర్చడానికే చాలా కష్టపడాల్సి వస్తోందంటూ అసలు సమస్యను పక్కన పెట్టి అధికార పక్షం పబ్లిసిటీ స్టంట్లు చేస్తోంది. చంద్రబాబు హయాంలో అప్పులు జరిగిన మాట వాస్తవం. మరి, వైఎస్‌ జగన్‌ హయాంలో ఏం జరుగుతోంది.? అప్పుడూ, ఇప్పుడూ ప్రభుత్వం అప్పుల మీదనే ఆధారపడాల్సిన దుస్థితిని ఏమనుకోవాలి.?

అభివృద్ధి ఊసెత్తకుండా సంక్షేమ పథకాల పేరుతో ఓటు బ్యాంకు రాజకీయాల్ని ప్రభుత్వాలు చేసినంతకాలం పరిస్థితి ఇలాగే వుంటుంది. వివిధ సంక్షేమ పథకాల ద్వారా ప్రజలకు ‘సొమ్ములు’ ప్రభుత్వం నుంచి అందుతున్నా, ప్రభుత్వాలకు అప్పులు పెరుగుతున్న దరిమిలా, రాబడి కోసం.. మళ్ళీ ఆ ప్రజలపైనే భారం వేయక తప్పని పరిస్థితి నెలకొంటుంది. అంతిమంగా ప్రభుత్వాల పబ్లిసిటీ స్టంట్స్‌కి నష్టపోయేది ప్రజలు మాత్రమే.