Soldiers: దేశ రక్షణలో భాగంగా ప్రాణాలు లెక్కచేయడమే కాదు.. కుటుంబానికి దూరంగా ఉంటారు సైనికులు (Soldiers). బదిలీలపై అనేక ప్రదేశాలకు వెళ్తారు. సైనికుల పిల్లలు కూడా అనేక ప్రాంతాలు వెళ్లాల్సి ఉంటుంది. దీనిపై సైనికుల పిల్లలు ఎదుర్కొనే భావోద్వేగాలపై ఇండియన్ ఎయిర్ ఫోర్స్ (Indian Airforce) స్క్వాడ్రన్ లీడర్ నిహారికా హండా (Squadron leader Niharika Handa) సోషల్ మీడియాలో చేసిన పోస్టు ఆసక్తిగా మారింది.
‘సైనికుల పిల్లలు గొప్పవారు. ఒక ప్రాంతానికి, తోటి చిన్నారులతో కలిసేలోపు మరో ప్రాంతానికి వెళ్లిపోతారు. తల్లిదండ్రుల కోసం తమ ఇష్టాలు, స్నేహాలను త్యాగం చేస్తారు. చదువు ఒకచోట జరగదు. మార్పును స్వీకరిస్తారు. చిన్న వయసులో ఇదేమంత సులభమైనది కాదు’.
‘ధైర్యసాహసాలు ప్రదర్శిస్తూ ఒకరకంగా దేశానికి సేవ చేస్తున్నారు. అందుకే సైనికుల పిల్లలపై నాకు అత్యంత ఆరాధనాభావం ఉంటుంద’ని అన్నారు. బిజీ షెడ్యూల్లో తన బిడ్డ అందిస్తోన్న సహకారాన్ని ప్రస్తావిస్తూ ధన్యవాదాలు తెలిపారు. ఈమేరకు తన చిన్నారితో దిగిన ఫొటో షేర్ చేశారు. దీంతో నెటిజన్ల నుంచి ఆమెకు మద్దతిస్తూ అనేక సందేశాలు పంపిస్తున్నారు.