కోవిడ్ 19: తప్పంతా ప్రజలదేనా.? ప్రభుత్వాలది తప్పు కాదా.?

కరోనా వైరస్.. కోవిడ్ 19.. ఇది ప్రపంచానికి పెను ముప్పుగా మారింది. ఇదిగో వ్యాక్సిన్ అన్నారు.. అదిగో కేసులు పెరుగుతున్నాయంటున్నారు. ఏది నిజం.? అసలేం జరుగుతోంది తెలుగు రాష్ట్రాల్లో.. భారతదేశంలో.. ప్రపంచంలోని చాలా దేశాల్లో.? సరే, ప్రపంచం సంగతి పక్కన పెడదాం.. మన దేశం, అందునా మన తెలుగు రాష్ట్రాల విషయానికొద్దాం. ఆగస్ట్ 16 నుంచి ఆంధ్రప్రదేశ్‌లో స్కూళ్ళు తెరచుకోనున్నాయి.

తెలుగు రాష్ట్రాల్లో నిన్ననే సినిమా థియేటర్లూ తెరచుకున్నాయి. పార్కులు, పర్యాటక ప్రాంతాలైతే గత కొద్ది రోజులుగా కిటకిటలాడిపోతున్నాయి. రామప్ప దేవాలయానికి యునెస్కో గుర్తింపు లభించడంతో, అక్కడికి వెళ్ళి వచ్చేందుకు తెలంగాణ ప్రభుత్వం ప్రత్యేక ఏర్పాట్లు చేస్తోంది.. పర్యాటకులకు. పబ్బులు, క్లబ్బులు ఓ రేంజ్‌లో తెలుగు రాష్ట్రాల్లో సందడి చేస్తున్నాయి. రెస్టారెంట్లు ఫుల్ అయిపోతున్నాయి. ప్రజా రవాణా కూడా కిక్కిరిసిపోతోంది. దేవాలయాలకీ జనం పోటెత్తుతున్నారు. తిరుమల తిరుపతి శ్రీ వెంకటేశ్వరస్వామిని దర్శించుకోవడాలంటే 300 రూపాయల టిక్కెట్ కొనుక్కోవాల్సిందే. ఉచిత దర్శనం కల్పిస్తే కరోనా ముప్పు పెరుగుతుందనే చెత్త వాదనని టీటీడీ తెరపైకి తెస్తోంది. ఒకదానితో ఒకటి అస్సలు పొంతన లేని ప్రకటనలు ప్రభుత్వాల నుంచి వస్తున్నాయి.

కరోనా బారిన పడి కోలుకున్న తెలంగాణ ముఖ్యమంత్రి కేసీయార్, వెంటనే.. జనంలోకి వెళ్ళిపోయారు. బహిరంగ సభలు పెట్టేశారు.. సహపంక్తి భోజనాలు కూడా చేసేశారు. ఇవేవీ కరోనా వ్యాప్తిని పెంచవని మనం అనుకోవాలన్నమాట. ఆంధ్రప్రదేశ్ రాష్ట్రంలో అయితే, అధికార పార్టీ నేతలు చేస్తున్న పొలిటికల్ కార్యక్రమాల హంగామా అంతా ఇంతా కాదు. మాస్కుల్లేకుండా బయటకొస్తే జరీమానా.. అంటున్నాయి ప్రభుత్వాలు. మాస్కులొక్కటీ సరిపోతాయా.? సోషల్ డిస్టెన్సింగ్ సంగతేంటి.? జనం గుమికూడే అవకాశం వున్న వినోద కేంద్రాల విషయమై ఎందుకు ప్రభుత్వాలు ఆంక్షలు విధించలేకపోతున్నాయి.?

‘సెకెండ్ వేవ్ తగ్గకపోవడానికి కారణం ప్రజల తీరు..’ అంటూ ప్రభుత్వాలు, తప్పంతా ప్రజల మీద నింద వేసేసి చేతులు దులిపేసుకోవడం గమనార్హం. అన్నట్టు, వర్క్ ఎట్ హోం అవకాశం ఇప్పటిదాకా కల్పించిన కొన్ని కంపెనీలు, కార్యాలయాలకు రావాల్సిందిగా ఉద్యోగులపై ఒత్తిళ్ళు తెస్తుండడం.. ప్రభుత్వ కార్యాలయాలూ జనంతో కిటకిటలాడుతుండడం.. ఇవన్నీ కరోనా తీవ్రత పెరగడానికి కారణాలే. మూడో వేవ్ కోసం సర్వసన్నద్ధమవుతున్నాం.. అని తెలుగు రాష్ట్రాల్లోని ప్రభుత్వాలు చెబుతున్నాయి. ప్రభుత్వాలు సన్నద్ధమవుతాయి.. కానీ, చివరికి బలైపోయేది ప్రజలే.