ఈ మహమ్మారికి మగాళ్లపైనే మిక్కిలి మక్కువ

ప్రపంచాన్ని గడగడలాడిస్తున్న కరోనా మహమ్మారికి మగాళ్లంటేనే ఎక్కువ ఇష్టమేమో. ఈ వైరస్ బారిన పడి ప్రాణాలు కోల్పోతున్నవారిలో మగమహారాజులే ఎక్కువ మంది ఉంటున్నారు. కోవిడ్-19 స్త్రీ, పురుషులు ఇరువురికీ సమానంగానే సోకుతున్నా.. స్త్రీలతో పోలిస్తే, పురుషులకే ఎక్కువ నష్టం చేస్తోంది.

ప్రపంచవ్యాప్తంగా ఇప్పటివరకు నమోదైన మరణాలను పరిశీలిస్తే.. మగువల కంటే మగాళ్లే పెద్ద సంఖ్యలో ప్రాణాలు కోల్పోయారు. మహిళలతో పోలిస్తే పురుషుల మరణాల సంఖ్య ఏకంగా రెండున్నర రెట్లు ఎక్కువ కావడం గమనార్హం. చైనా నుంచి అమెరికా వరకు ఎక్కడ చూసినా ఇదే ఒరవడి కనిపిస్తోంది. చైనాలోని ట్రోంజెన్ ఆస్పత్రికి చెందిన పరిశోధకుల బృందం నిర్వహించిన అధ్యయనంలో ఈ మేరకు వెల్లడైంది.

తొలుత వయసులవారీగానే కరోనా మరణాలపై అధ్యయనాలు జరిగాయి. అయితే, ప్రపంచవ్యాప్తంగా నమోదవుతున్న మరణాలను పరిశీలించిన ఈ బృందం.. పురుషులే అధిక సంఖ్యలో ప్రాణాలు కోల్పోతున్నట్టు గుర్తించింది. దీంతో ఈ దిశగా పరిశోధనలు జరిపింది. ప్రపంచవ్యాప్తంగా సగటున కోవిడ్ బాధితుల మరణాల్లో 70 శాతం మంది పురుషులు ఉన్నట్టు గుర్తించారు. దీంతో మహిళల్లో రోగనిరోధక శక్తి ఎక్కువగా ఉండటం దీనికి కారణమా లేక పురుషుల్లో ఉన్న ఇతరత్రా సమస్యలు వారిలో అధిక మరణాలకు కారణమవుతున్నాయా అనే అంశంపై వీరు దృష్టి సారించారు.

నిజానికి కరోనా వైరస్ సోకినవారిలో గుండె సంబంధిత లేదా శ్వాసకోశ సమస్యలున్నవారికి రిస్క్ ఎక్కువగా ఉంటుందని ముందుగానే గుర్తించారు. అలాంటివారు జాగ్రత్తగా ఉండాలని పలువురు పరిశోధకులు హెచ్చరించారు. తాజాగా మహిళల కంటే పురుషులకే దీనివల్ల రిస్క్ ఎక్కువగా ఉందని తేలడంతో మగమహారాజులు అప్రమత్తంగా ఉండాలని సూచిస్తున్నారు. ఇందుకు గల కారణాలపై అధ్యయనాలు జరుగుతున్నాయని, వాటి ఫలితాలు వస్తే ఎందుకు ఇలా జరుగుతోందనే విషయం తెలుస్తుందని చైనాకు చెందిన వైద్యుడు జిన్ క్యూ యాంగ్ పేర్కొన్నారు.