ఎక్సక్లూసివ్ ఇంటర్వ్యూ: మహేష్, ఎన్టీఆర్ లతో మల్టీస్టారర్ చేయాలనుంది – రాజ్ తరుణ్

యంగ్ హీరో రాజ్ తరుణ్ ప్రస్తుతం వరస ప్లాపులతో సతమతమవుతున్నాడు. రాజ్ తరుణ్ నటించిన రీసెంట్ సినిమాలు పరాజయం పాలయ్యాయి. సో ఎలాగైనా ఒక సాలిడ్ హిట్ సాధించి తిరిగి హిట్ ట్రాక్ ఎక్కాలనుకుంటున్నాడు రాజ్ తరుణ్. ఈ యువ హీరో నటించిన లేటెస్ట్ మూవీ ఒరేయ్ బుజ్జిగా. ఈ చిత్రం అక్టోబర్ 2న ఆహాలో విడుదలవుతోంది. మరి ఈ నేపథ్యంలో రాజ్ తరుణ్ సినిమా గురించి, ఇంకా తన పెర్సనల్ లైఫ్ లో ఆసక్తికర అంశాల గురించి ఏం చెబుతాడో చూద్దామా…

ఈ లాక్ డౌన్ పీరియడ్ ను ఎంజాయ్ చేశారా?

ఎంజాయ్ అని చెప్పలేను కానీ నాకు ఏకాంతంగా గడపడం అంటే ఇష్టం. వీలున్నప్పుడల్లా ఏకాంతంగా గడుపుతుంటాను. ఈ లాక్ డౌన్ వల్ల అది సాధ్యపడింది. అయితే నాకు ఎప్పుడూ పని చేస్తుండటమే ఇష్టం. కానీ ఈ లాక్ డౌన్ వల్ల పని లేకుండా చాలా నెలలు గడపాల్సి వచ్చింది. అది కొంచెం ఇబ్బంది పెట్టింది.

ఒరేయ్ బుజ్జిగా మీ మొదటి ఓటిటి రిలీజ్. ఎలా అనిపిస్తోంది?

మా ఒరేయ్ బుజ్జిగా మార్చ్ 25న విడుదల కావాల్సి ఉంది. దానికి తగ్గట్లుగానే ప్రిపేర్ అయ్యాం. అయితే అనుకోకుండా ఈ కరోనా మహమ్మారి వలన రిలీజ్ ను వాయిదా వేయక తప్పలేదు. అయితే ఓటిటి అనేది థియేటర్స్ కు మంచి ప్రత్యామ్నాయంగా భావిస్తాను. ఆహాలో మా సినిమా విడుదల కాబోతుండడం నిజంగా సంతోషంగా ఉంది.

మీ దర్శకుడు విజయ్ కుమార్ కొండా, నిర్మాత రాధా మోహన్ లతో పనిచేయడం ఎలా అనిపిస్తోంది?

విజయ్ కుమార్ నాకు మంచి స్నేహితుడు అయిపోయాడు. మేము మళ్ళీ త్వరలో కలిసి పనిచేయాలని అనుకుంటున్నాం. నిజంగా చాలా అద్భుతంగా ఉంది తనతో పనిచేయడం. ఇక నా నిర్మాత రాధా మోహన్ చాలా స్వీట్ పర్సన్.

మీ చిత్రాన్ని ఓటిటిలో విడుదల చేయాలన్న ఆలోచన ఎవరిది?

హానెస్ట్ గా చెప్పాలంటే అది నా ఆలోచనే. ఇప్పుడున్న పరిస్థితుల్లో థియేటర్స్ లో విడుదల చేయడమనేది దాదాపు అసాధ్యం. అందుకే రాధా మోహన్ గారితో మాట్లాడాను. ఆయన కూడా పరిస్థితిని అర్ధం చేసుకుని నిర్ణయం తీసుకున్నారు.

మాళవిక నాయర్ గురించి ఏం చెబుతారు?

మేము సెట్స్ లో రెండో రోజు నుండే బెస్ట్ ఫ్రెండ్స్ అయిపోయాం. చాలా టాలెంటెడ్ హీరోయిన్. మంచి కోస్టార్/

కొన్ని నెలల క్రితం ఒక యాక్సిడెంట్ కేసులో మీపై చాలా రూమర్లు వచ్చాయి. దానిపై ఇప్పుడు మీరేమంటారు?

ఇప్పుడు దాని గురించి మాట్లాడడానికి ఏం లేదు. నాకు ఇష్టం లేదు కూడా. నేను చెప్పాలనుకున్న విషయం ఒకటే. ఆ యాక్సిడెంట్ లో ఉన్నది నేనే కానీ నేను ఏదో తాగి ఉన్నాను, మత్తులో యాక్సిడెంట్ చేశాను అన్న దాంట్లో ఎటువంటి నిజం లేదు. అందులో నా తప్పు ఏం లేదు.

మీరు ఫ్యూచర్ లో సిక్స్ ప్యాక్ లో కనిపించే అవకాశాలు ఉన్నాయా?

నాకు ఎప్పుడూ బాయ్ నెక్స్ట్ డోర్ తరహా కుర్రాడిలా కనిపించడమే ఇష్టం. అయితే పాత్ర డిమాండ్ చేస్తే కచ్చితంగా ఆలోచిస్తా.

హెబ్బా పటేల్ తో మీ రిలేషన్ గురించి రూమర్స్ పై స్పందన?

ఇప్పటికే చాలా సార్లు క్లారిటీ ఇచ్చా. తను నాకు మంచి స్నేహితురాలు మాత్రమే.

మీరు ఇప్పుడు రిలేషన్ లో ఉన్నారా?

లేదు. గతంలో ఇండస్ట్రీకి సంబంధం లేని వ్యక్తితో రిలేషన్ లో ఉన్నా. కానీ ఇప్పుడు నేను సింగిల్.

మరి పెళ్లి ఎప్పుడు?

కచ్చితంగా మరో 3,4 ఏళ్ళు పడుతుంది.

ఇండస్ట్రీలో మీ క్లోజ్ ఫ్రెండ్స్ ఎవరు?

నిఖిల్, హెబ్బా పటేల్ నాకు చాలా క్లోజ్. అలాగే నా దర్శకులు అందరితో నాకు మంచి రిలేషన్ ఉంది.

మీ సినిమా రివ్యూలను ఫాలో అవుతారా?

చదువుతాను. అయితే వాటిని అంత సీరియస్ గా తీసుకోను.

టాలీవుడ్ లో నేపోటిజం ఉందా?

లేదు.

మీరు నటులు కాకపోయే ఉంటే ఏమై ఉండేవారు?

దర్శకుడ్ని అయ్యేవాణ్ణేమో.

మీకు మల్టీస్టారర్ చేయాల్సి వస్తే, ఎవరితో చేయాలనుంది?

నాకు మహేష్ బాబు, ఎన్టీఆర్ అంటే చాలా ఇష్టం. వాళ్ళు నా ఫేవరెట్ హీరోలు. స్క్రిప్ట్ కుదిరితే వాళ్లతో మల్టీస్టారర్ చేయాలనుంది.

సొంత నిర్మాణ సంస్థ మొదలుపెట్టే ఆలోచన ఏదైనా?

నాకు సినిమాతో ఏదో విధంగా అసోసియేట్ అవ్వడం ఇష్టం. అన్నీ అనుకున్నట్లు జరిగితే నిర్మాత కూడా అవుతానేమో.

ఆహా గురించి మీరేం చెబుతారు?

మా చిత్రాన్ని వాళ్ళు చాలా బాగా ప్రమోట్ చేస్తున్నారు. ఆహా వంటి ఓటిటి సంస్థ ద్వారా మా చిత్రం విడుదల కానుండడం నిజంగా చాలా ఆనందంగా ఉంది.

ఒరేయ్ బుజ్జిగా గురించి చెప్పమంటే ఏం చెబుతారు?

2 గంటల పాటు ఏ టెన్షన్ లేకుండా హాయిగా ఎంటర్టైన్ చేసే చిత్రం మా ఒరేయ్ బుజ్జిగా. ప్రస్తుత పరిస్థితుల వల్ల అందరూ వివిధ రకాల టెన్షన్స్ తో సతమతమవుతున్నారు. వాళ్లందరికీ ఒరేయ్ బుజ్జిగా మంచి రిలీఫ్.

ఏవైనా కొత్త ప్రాజెక్ట్స్ సైన్ చేసారా?

మొత్తం 7 ప్రాజెక్టులు ఈ మధ్య కాలంలో సైన్ చేశాను. నా తర్వాత చిత్రం కూడా విజయ్ కుమార్ కొండా దర్శకత్వంలోనే ఉంటుంది. మిగతా ప్రాజెక్టుల విషయాలు త్వరలో తెలియజేస్తా.

వెబ్ సిరీస్ లలో నటించే ఉద్దేశం ఏమైనా ఉందా?

వెబ్ సిరీస్ లలో నటించాలని నాకు కూడా ఉంది. నిజానికి ఒక వెబ్ సిరీస్ కు సైన్ చేశా. అయితే డేట్స్ క్లాష్ వల్ల తప్పుకోవాల్సి వచ్చింది. ఫ్యూచర్ లో కచ్చితంగా వెబ్ సిరీస్ లో నటిస్తా.