ఈఎస్ఐ కుంభకోణం.. రూ.4.47 కోట్లు స్వాధీనం

రాష్ట్రంలో అవినీతి రూపేణా ఆర్జించిన కట్టల కట్టల నోట్లు వెలుగు చూస్తూనే ఉన్నాయి. ఇటీవల రూ.1.10 కోట్ల నగదు లంచంగా తీసుకుంటూ కీసర తహశీల్దార్ నాగరాజు పట్టుబడిన విషయం చూసి జనాలు నోరెళ్లబెట్టారు. ఒక్కసారిగా అన్ని నోట్ల కట్టలు చూసి అవాక్కయ్యారు. తాజాగా అంతకుమించిన నోట్ల కట్టలు వెలుగుచూశాయి. ఈసారి వంతు ఈఎస్ఐ కుంభకోణంలో అరెస్టు అయిన ఇండియన్ మెడికల్ సర్వీసెస్ (ఐఎంఎస్) మాజీ డైరెక్టర్ దేవికారాణిది కావడం విశేషం. ఆమె అక్రమమార్గంలో సంపాదించిన రూ.4.47 కోట్ల నగదను ఏసీబీ అధికారులు స్వాధీనం చేసుకోవడం సంచలనం సృష్టించింది.

ఈఎస్ఐకి సంబంధించిన మందుల కొనుగోళ్లలో భారీఎత్తున అవకతవకలకు పాల్పడి కోట్లు కూడబెట్టిన ఆరోపణలపై దేవికారాణిని అరెస్టు చేసిన సంగతి తెలిసిందే. ఈ కేసులో ముగ్గురు డాక్టర్లు సహా పలువురు ఈఎస్ఐ సిబ్బంది, ఫార్మా కంపెనీల డైరెక్టర్లు అరెస్టయ్యారు. ఈ కేసును దర్యాప్తు చేస్తున్న అవినీతి నిరోధక శాఖ అధికారులు తాజాగా దేవికారాణికి చెందిన రూ.4.47 కోట్ల నగదును ఓ రియల్టర్ నుంచి స్వాధీనం చేసుకున్నారు.

సైబరాబాద్ కమిషనరేట్ పరిధిలోని ఓ రెసిడెన్షియల్ వెంచర్ లో 6 ప్లాట్లతోపాటు 15వేల అడుగులు వాణిజ్యస్థలం నిమిత్తం ఆ మొత్తాన్ని దేవికారాణి పెట్టుబడిగా పెట్టినట్టు గుర్తించారు. ఇందులో దేవికారాణి వాటా రూ.3.75 కోట్లు కాగా, ఇదే కేసులో అరెస్టు అయిన ఫార్మాసిస్ట్ నాగలక్ష్మి వాటా రూ.72 లక్షలుగా నిర్ధారించారు. ఈ మొత్తం లెక్కల్లో లేని నగదేనని తేలింది. ఈ మొత్తంలో 2.29 కోట్లు చెక్కులు, ఆన్ లైన్ బదిలీ ద్వారా చెల్లించగా.. రూ.22 లక్షలు బినామీదార్ల పేరిట చెల్లించినట్టు కనుగొన్నారు.

ఆధారాలతో సహా సదరు రియల్టర్ కు నోటీసులు ఇవ్వడంతో తనకు దేవికారాణి చెల్లించిన మొత్తం రూ.4.47 కోట్లను ఏసీబీకి అప్పగించాడు. కాగా, నకిలీ బిల్లులు, తప్పుడు రికార్డులు ద్వారా భారీ ఎత్తున మందులు కొనుగోళ్లు జరిపినట్టు పత్రాలు సృష్టించి ప్రభుత్వ ఖజానా నుంచి రూ.11.69 కోట్ల మేర నగదును స్వాహా చేసినట్టు ఏసీబీ నిగ్గు తేల్చింది. ఈ మొత్తం కుంభకోణంలో దాదాపు రూ.300 కోట్ల మేర అవకతవకలు జరిగి ఉంటాయని ఏసీబీ తొలుత అంచనా వేయగా.. ప్రాథమిక దర్యాప్తు తర్వాత ఆ మొత్తం రూ.10 కోట్లకు పైగా అక్రమాలు జరిగినట్టు నిర్ధారించింది.

తాజాగా దీనికి సంబంధించిన నాలుగున్నర కోట్లను స్వాధీనం చేసుకున్న అధికారులు.. ఇంకా ఎక్కడైనా ఇలాంటి లావాదేవీలు జరిగాయా అనే అంశంపై దృష్టి సారించారు.