ఆంధ్రప్రదేశ్‌లో ‘దిశ’ చట్టం అమల్లో వుందా.?

దిశ చట్టం వల్లనే రాష్ట్రంలో మహిళలకు భద్రత దొరుకుతోందంటూ అధికార పార్టీ నేతలు, అందునా మంత్రులు పోటీ పడి మరీ మీడియా ముందు ప్రకటనలు దంచేస్తున్నారు. మహిళలపై అఘాయిత్యాలు జరిగితే గన్ కంటే ముందు జగన్ వస్తారంటూ గతంలో వైసీపీ నేత, ప్రస్తుత మంత్రి రోజా పలు సందర్భాల్లో చెప్పారు.

ఏదీ.. ఎక్కడ.? ఆంధ్రప్రదేశ్‌లో ఇటీవలి కాలంలో వరుసగా మహిళలపై దారుణాలు జరుగుతున్నాయి. రోజుకొకటిగా ఈ అఘాయిత్యాలు వెలుగు చూస్తున్నాయి. ఆయా ఘటనల్లో పోలీసు శాఖ ప్రకటనలు, మంత్రుల వ్యాఖ్యలు వివాదాస్పదమవుతున్నాయి.

గుంటూరులో సామూహిక అత్యాచార ఘటన జరిగితే, అక్రమ సంబంధం కారణంగా జరిగిన హత్యగా తేల్చారు పోలీసులు. ‘నా భార్యకు అక్రమ సంబంధం అంటగట్టి అవమానిస్తారా.? చనిపోయిన వ్యక్తితో రాజకీయమా.?’ అంటూ మృతురాలి భర్త కన్నీరు మున్నీరయ్యారు మీడియా ముందుకొచ్చి. ఇంకో ఘటనలో, నిందితుల్ని టీడీపీకి చెందినవారిగా ముద్ర వేసి, విషయాన్ని రాజకీయం చేసింది వైఎస్ జగన్ ప్రభుత్వం.

ఆయా ఘటనల్లో తీవ్రతను పరిగణనలోకి తీసుకుని, రాజకీయాల్ని పక్కన పెట్టి.. బాధ్యతాయుతంగా వ్యవహరించాల్సిన ప్రభుత్వం పెద్దలు, రాజకీయ విమర్శలతో సరిపెడుతుండడంతో, మృగాళ్ళకు భయం అంటూ లేకుండా పోయింది.

ప్రతిసారీ దిశ చట్టం పేరుతో పబ్లిసిటీ స్టంట్లు చేయడం తప్ప, అసలు ఆ చట్టం అమల్లో వుందా.? లేదా.? అన్నదానిపై ప్రజలకూ సరైన సమాచారం ఇవ్వడంలేదు. దిశ చట్టానికి కేంద్రం ఆమోద ముద్ర వేయలేదు. అది బిల్లుగానే వుంది. కానీ, దిశ పేరుతో పబ్లిసిటీ స్టంట్లు మాత్రం జోరుగా నడుస్తోంది. ఈ పబ్లిసిటీ కోసమే బోల్డంత ఖర్చు వృధాగా చేస్తున్నారన్న విమర్శలున్నాయి. లేని చట్టం పేరుతో ఖర్చులు, పబ్లిసిటీ స్టంట్లు.. ఇట్ హ్యాపెన్స్ ఓన్లీ ఇన్ ఆంధ్రప్రదేశ్.!