‘ఆచార్య’ చిరంజీవి గుణపాఠం నేర్చుకోవాల్సిన పనిలేదు

మెగాస్టార్ చిరంజీవి నిత్య విద్యార్ధి. లేకపోతే, ఇన్నేళ్ళ కెరీర్ ఎలా సాధ్యమవుతుంది.? రాజకీయాల్లోకి వెళ్ళి తిరిగి సినిమాల్లోకి వచ్చేందుకు దాదాపు పదేళ్ళ గ్యాప్ తీసుకున్నా, వస్తూనే డాన్సుల్లోనూ.. డైలాగుల్లోనూ.. తనదైన ప్రత్యేకతను చిరంజీవి చాటుకోవడం చిన్న విషయమేమీ కాదు.

‘ఆచార్య’ సినిమా నేపథ్యంలో చిరంజీవి మీద దారుణమైన ట్రోలింగ్ జరిగింది. నిజానికి, ఇంతటి వ్యతిరేకతను చిరంజీవి ఇంతకు ముందెన్నడూ ఎదుర్కోలేదా.? అంటే, కెరీర్ బిగినింగ్ నుంచీ చిరంజీవి.. ఇలాంటి ఎన్నో ఆటుపోట్లను తట్టుకుని నిలబడ్డారు.

‘జగదేక వీరుడు అతిలోక సుందరి’ సినిమా గురించి ప్రత్యేకంగా మాట్లాడుకోవాలి. అప్పట్లో విపరీతమైన వాతావరణ పరిస్థితులు ఆ సినిమాని అయోమయంలో పడేశాయి. వరదల నడుమ, ఆ సినిమా విడుదలైతే.. ఆ వరదల్లో థియేటర్లలోని కుర్చీలు మునిగిపోయినా అభిమానులు ఆ కుర్చీల్లో నిల్చుని సినిమా చూశారు.

అప్పటికీ, ఇప్పటికీ ఎప్పటికీ చిరంజీవి డాన్సులు.. అభిమానుల్ని ప్రతిసారీ అంతకు మించి.. అనే స్థాయిలోనే అలరిస్తుంటాయి. ఆరు పదుల వయసులోనూ స్క్రీన్ మీద కనిపించే చిరంజీవిలో అలసత్వం అనేది మనం చూడలేం. దటీజ్ మెగాస్టార్ చిరంజీవి.

‘మృగరాజు’ కావొచ్చు, ‘ఆచార్య’ కావొచ్చు.. ఇవేవీ చిరంజీవి స్టార్‌డమ్‌కి బ్రేకులు వేయలేవ్. ఎందుకంటే, పబ్లిసిటీతో వచ్చిన స్టార్‌డమ్ కాదది. వన్ టూ టెన్.. మెగాస్టార్ చిరంజీవి.. ఆ తర్వాతే మేము.. అని గతంలో సూపర్ స్టార్ మహేష్‌బాబు చెప్పినట్లు.. మెగాస్టార్ చిరంజీవి స్థాయి వేరు.. ఆయన స్థానం వేరు.

చిన్న సినిమా, పెద్ద సినిమా.. అన్న తేడాల్లేకుండా తనకు చేతనైనంతలో ఆయా సినిమాల్ని ప్రమోట్ చేయడానికి చిరంజీవి శక్తి వంచన లేకుండా కృషి చేస్తారు.. అదీ పరిశ్రమ బిడ్డగా. అలాంటి చిరంజీవి సినిమాని ఫ్లాప్ అవ్వాలని కోరుకున్నవారికి.. సినిమా విడుదలయ్యాక.. నెగెటివ్ రిజల్ట్ వచ్చాక పైశాచిక ఆనందం పొందుతున్నవారికీ.. ఏం చెప్పగలం.?

ఏనుగుని చూసి కొన్ని మొరుగుతుంటాయ్.! శిఖరాన్ని చూసి కొన్ని ఎగతాళి చేస్తాయ్.! ‘ఆచార్య’ చిరంజీవి గుణపాఠం నేర్చుకోవాల్సిన పనిలేదు. ఆయన చెప్పే ప్రతి డైలాగ్, ఆయన పెట్టే ప్రతి ఎక్స్‌ప్రెషన్.. ఆయన వేసే ప్రతి డాన్స్ మూమెంట్.. నేర్చుకునేందుకు లక్షలాది మంది, కోట్లాది మంది విద్యార్థులు ఎప్పుడూ వుంటారు. దటీజ్ ‘ఆచార్య’ చిరంజీవి.