జెంటిల్మన్ గేమ్ రోజురోజుకూ కొత్త పుంతలు తొక్కుతోంది. అంపైరింగ్ తప్పిదాలు లేకుండా చూసేందుకు ఇప్పటికే ఐసీసీ ఎన్నోరకాల సౌకర్యాలను తీసుకొచ్చింది. బెయిల్స్ వెలగడం, బంతి బ్యాట్ ను తాకిందో తెలుసుకునేందుకు అల్ట్రా ఎడ్జ్, అంపైరింగ్ నిర్ణయాలను సమీక్షించేందుకు డీఆర్ఎస్.. ఇలా ఎన్నో సంస్కరణలు క్రికెట్ లోకి వచ్చి చేరాయి. త్వరలో మరో విప్లవాత్మక మార్పు క్రికెట్ ను పలకరించనుంది. బౌలర్ సంధించిన బంతే.. తనకు సంబంధించిన వివరాలను రియల్ టైమ్ లో చెప్పేస్తుంది.
తన లైన్ లో మార్పు ఏదైనా ఉందా? బ్యాట్ కు తగిలానా లేదా? అది కచ్చితమైన ఎల్బీడబ్ల్యూనే కాదా వంటి వివరాలను ఎప్పటికప్పుడు చేరవేస్తుంది. ఆస్ట్రేలియాకు చెందిన బెన్ టాటర్స్ ఫీల్డ్ అనే క్రీడా పరికరాల రూపకర్త ఈ వినూత్నమైన బంతిని రూపొందించాడు. సాధారణ క్రికెట్ బంతిలోనే ఓ మైక్రో చిప్ అమర్చాడు. దీంతో అది తన కదలికలను, వేగాన్ని, వెళుతున్న దిశను కచ్చితంగా లెక్కగట్టి, ఆ వివరాలను రియల్ టైమ్ లో డేటా సెంటర్ కు పంపిస్తుంది.
బౌలర్ తనను ఎంత వేగంతో సంధించాడు? పిచ్ పై సరైన లైన్లోనే విసిరాడా? బ్యాట్ కు తగిలానా లేదా వంటి వివరాలను ఆ బంతే చెప్పేస్తుందన్న మాట. ప్రస్తుతం ప్రయోగ దశలో ఉన్న ఈ ప్రాజెక్టును ముందుకు తీసుకెళ్లేందుకు ఆస్ట్రేలియాకు చెందిన క్రీడా పరికరాల తయారీ సంస్థ కూకబుర్రా అంగీకరించింది. బెన్ కు అవసరమై మద్దతు అందిస్తామని పేర్కొంది. ‘తొలిసారిగా బంతి మాట్లాడబోతోంది’ అని కూకబుర్రా ప్రతినిధి షెనాన్ గిల్ వ్యాఖ్యానించారు.
కూకబుర్రా స్మార్ట్ బాల్.. చూడటానికి సాధారణ బంతిలాగే ఉంటుందని, కానీ బౌలర్ విసిరిన బంతికి సంబంధించిన అన్ని వివరాలను డేటా సెంటర్ కు పంపిస్తుందని చెప్పారు. దూరంగా కొట్టినప్పుడు గోల్ప్ బంతి ఎక్కడ పడిందో కచ్చితంగా తెలుసుకోవడానికి అందులో జీపీఎస్ పరికరం అమరిస్తే సరిపోతుంది కదా అని తనకు ఐడియా వచ్చిందని బెన్ పేర్కొన్నాడు. అనంతరం క్రికెట్ బంతిలోనూ ఈ తరహా టెక్నాలజీ ఎందుకు వినియోగించకూడదనే ఆలోచన రావడంతో ఈ ప్రయోగానికి శ్రీకారం చుట్టినట్టు వివరించాడు.
ఇప్పటికే అంతర్జాతీయ క్రికెట్ మండలి (ఐసీసీ)కి ఈ బంతి గురించి తెలియజేశామని, పరీక్షల అనంతరం తొలుత కోచింగ్ సెషన్స్ లో దీనిని వినియోగించే అవకాశం ఉందని పేర్కొన్నాడు. అన్నీ సవ్యంగా జరిగితే ఇకపై అంర్జాతీయ క్రికెట్ లో బంతులు మాట్లాడం ఖాయమని ధీమా వ్యక్తంచేశాడు.
668782 983783It can be difficult to write about this topic. I feel you did an excellent job though! Thanks for this! 871309