మళ్ళీ మళ్ళీ అదే గోల: ఎంపీ రఘురామకృష్ణరాజుని కొట్టారా.? లేదా.?

వైసీపీ రెబల్ ఎంపీ రఘురామకృష్ణరాజు కాళ్ళకి బ్యాండేజీ వేయడం, ఆయన స్ట్రెచర్ మీద పడుకుని వుండడానికి సంబంధించిన ఫొటోలు సోషల్ మీడియాలో హల్‌చల్ చేస్తున్నాయి. ఇటీవల రాజద్రోహం కేసులో అరెస్టయిన రఘురామ, తనను సీఐడీ అరెస్టు చేసిన అనంతరం తనపై థర్డ్ డిగ్రీ ప్రయోగించారంటూ ఆరోపణలు చేసిన విషయం విదితమే. రఘురామ కాలికి గాయాలున్నాయనడానికి సాక్ష్యంగా కొన్ని ఫొటోలు కోర్టు ముందుకు తీసుకెళ్ళారు ఆయన తరఫు న్యాయవాదులు. దాంతో, కోర్టు ఆ గాయాల వెనుక నిజాల్ని నిగ్గు తేల్చాల్సిందిగా ఆదేశించింది. ప్రభుత్వ ఆసుపత్రితోపాటు, ప్రైవేటు ఆసుపత్రిలోనూ వైద్య పరీక్షలు నిర్వహించాలని న్యాయస్థానం ఆదేశిస్తే, ప్రభుత్వాసుపత్రి రిపోర్టుతో సరిపెట్టడం అప్పట్లో వివాదాస్పదమయ్యింది.

కోర్టు ధిక్కరణ కింద న్యాయస్థానం చర్యలకు ఉపక్రమించింది కూడా. ఇక, సుప్రీంకోర్టును ఆశ్రయించి బెయిల్ పొందడం, ఈ క్రమంలో రఘురామకి ఆర్మీ ఆసుపత్రిలో వైద్య పరీక్షలు, చికిత్స.. ఇవన్నీ తెలిసిన విషయాలే. బెయిల్ తర్వాత రఘురామ ఢిల్లీకి వెళ్ళి, ఎయిమ్స్ ఆసుపత్రిలో చేరారు. అక్కడాయన కాళ్ళకు బ్యాండేజీ వేయడమే కాదు, కొన్నాళ్ళపాటు కాలు కింద పెట్టకూడదంటూ వైద్యులు సూచించారు. ఇంతా జరిగాక, అసలు రఘురామ కాలిపై గాయాలున్నాయని ఆర్మీ ఆసుపత్రి నివేదిక ఇవ్వలేదంటోంది ఏపీసీఐడీ. ఆ గాయాలు ఏపీ సీఐడీ అదుపులోకి తీసుకున్నాక జరిగినవిగా నిర్ధారణ కాలేదని కూడా ఏపీ సీఐడీ స్పష్టం చేసింది. మరెలా రఘురామకి గాయాలయ్యాయి.? అసలు రఘురామకి గాయాలయ్యాయా.? లేదా.? సాదా సీదా వ్యక్తి విషయంలో అయినా నిజాలు నిగ్గు తేల్చాల్సిందే.

ఆయన ఓ ప్రజా ప్రతినిథి.. పైగా ఎంపీ.. అలాంటి వ్యక్తి విషయంలో ఇంత గందరగోళమెందుకు.? రఘురామ నాటకాలాడుతున్నారా.? ప్రభుత్వం, అధికార పార్టీ, ఏపీ సీఐడీ చెబుతున్నది అవాస్తవమా.? అన్నటికీ మించి సర్వోన్నత న్యాయస్థానానికి ఆర్మీ ఆసుపత్రి అందించిన వైద్య నివేదిక ఏంటన్నది తేలాలిప్పుడు. సుప్రీంకోర్టు ఇచ్చిన బెయిల్ ఆదేశాలు, ఈ క్రమంలో జరిగిన వాదనలు, ఆర్మీ ఆసుపత్రి నివేదికపై మీడియాలో వచ్చిన కథనాలు.. వీటన్నిటిలో వాస్తవాలేంటో ప్రజలకు తెలిసేదెలా.?