అస్త్రాలన్నీ ఒకేసారి వాడేసిన రఘురామకృష్ణరాజు.?

రాజద్రోహం కేసులో అరెస్టయిన రఘురామకృష్ణరాజు, ప్రస్తుతం తెలంగాణలోని సికింద్రాబాద్ ఆర్మీ ఆసుపత్రిలో వైద్య చికిత్స పొందుతున్నారు.. అదీ సుప్రీంకోర్టు ఆదేశాల మేరకు. హైద్రాబాద్ నుంచి ఆయన్ని అరెస్టు చేసి గుంటూరుకి తరలించిన ఏపీ సీఐడీ, కోర్టు ఆదేశాల మేరకు వైద్య పరీక్షలు గుంటూరు ప్రభుత్వాసుపత్రిలో నిర్వహించి, గుంటూరు జైలుకి తరలించింది. ఈ క్రమంలో ప్రైవేటు ఆసుపత్రిలోనూ వైద్య పరీక్షలు నిర్వహించాలన్న న్యాయస్థానం ఆదేశాల్ని ఏపీ సీఐడీ పక్కన పెట్టడం వివాదానికి తావిచ్చింది.

ఎలాగైతేనేం, సర్వోన్నత న్యాయస్థానాన్ని ఆశ్రయించి రఘురామ కాస్త ఊరట పొందారు. అయితే, వెంట వెంటనే రఘురామ చాలా అస్త్రాలు వాడేశారనీ, ఇది ముందు ముందు ఆయనకు ఇబ్బందికరంగా మారుతుందనీ రాజకీయ విశ్లేషకులతోపాటు, న్యాయ నిపుణులూ అభిప్రాయపడుతున్నారు. బెయిల్ కోసం హైకోర్టును ఆశ్రయించే అవకాశం వుంది. సీఐడీ కోర్టులోనూ ఆ అవకాశం వుంటుంది రఘురామకి. సరే, సుప్రీంకోర్టును ఆశ్రయించడం అనేది ఆయనకున్న హక్కు.

మరోపక్క, రఘురామ కుటుంబ సభ్యులు, కేంద్ర హోంశాఖకు లేఖ రాశారు.. కేంద్ర హోంమంత్రి అమిత్ షాను కూడా కలిశారు. తాజాగా లోక్ సభ స్పీకర్ వద్ద కూడా తమ ఆవేదన వెల్లగక్కుకున్నారు. ఇదంతా ఇప్పుడే అవసరమా.? అన్న చర్చ సర్వత్రా జరుగుతోంది. అస్త్రాలన్నీ ఒకేసారి వాడేస్తే, రఘురామ మీద చాలా కేసులు వున్న దరిమిలా, అప్పుడు అవసరమయ్యే కొన్ని అస్త్రాల ఇప్పుడే వాడేయడం వల్ల నష్టం కలుగుతుందన్న భావన రఘురామ సన్నిహితుల్లోనూ వ్యక్తమవుతోంది.

మరోపక్క రఘురామ బెయిల్ సహా వివిధ అంశాలపై రేపు సర్వోన్నత న్యాయస్థానంలో విచారణ జరగనుంది. అక్కడ తీర్పు ఎలా వస్తుంది.? అన్నది ప్రస్తుతానికి సస్పెన్సే. అన్నటికీ మించి రఘురామను ఏపీ సీఐడీ పోలీసులు కొట్టారా.? లేదా.? ఆర్మీ ఆసుపత్రి నివేదిక ఎలా వుండోతోందన్నదే అసలు సిసలు ఉత్కంఠ.