రౌడీలను రఫ్ఫాడిస్తున్న యోగి: మూడేళ్లలో 5వేల ఎన్ కౌంటర్లు.!

ఒకప్పుడు ఉత్తరప్రదేశ్ అంటే గూండా రాజ్యమే అనే భావన ఉండేది. ఎక్కడ చూసినా గ్యాంగులు, రౌడీయిజం.. అచ్చం సినిమాల్లో చూసినట్టుగానే కనిపించేది. ఆయా రౌడీ గ్యాంగులకు రాజకీయ నేతల అండదండలు ఉండేవి. వారికి వీరు.. వీరికి వారు పరస్పరం సహకరించుకునేవారు. ఇక లా అండ్ ఆర్డర్ ఎలా ఉంటుందో ఊహించుకోవచ్చు. గతంలో ఉన్న ప్రభుత్వాలు రౌడీయిజాన్ని అణచివేసే విషయంలో అంత సమర్థంగా పనిచేయలేదనే ఆరోపణలు ఉన్నాయి. ఈ నేపథ్యంలో 2017లో బీజేపీ ఘన విజయం సాధించడంతో సీఎంగా పగ్గాలు చేపట్టిన యోగి ఆదిత్యనాథ్.. రౌడీల పాలిట సింహస్వప్నంగా మారారు.

గుండాగిరీ అనేదే లేకుండా చేయాలని సంకల్పించారు. దీంతో ఆయన హయాంలో వేలాది ఎన్ కౌంటర్లు జరిగాయి. మూడేళ్లలో ఏకంగా 5,148 ఎన్ కౌంటర్లు జరగ్గా.. 108 మంది రౌడీలు హతమయ్యారు. 1848 మంది గాయపడ్డారు. తాజాగా ఎనిమిది మంది పోలీసులను చంపిన రౌడీ షీటర్ వికాస్ దుబేతోపాటు అతడి అనుచరులను కూడా యూపీ పోలీసులు మట్టుబెట్టారు. రౌడీయిజాన్ని యోగి ఉక్కుపాదంతో అణచివేస్తుండటంతో రౌడీ షీటర్లు బెంబేలెత్తిపోయారు. బెయిల్ పై ఉన్నవాళ్లు, ఇతరత్రా కారణాలతో బయట ఉన్నవారు వెంటనే జైలుకు వెళ్లిపోయారు. ఈ మూడేళ్లలో ఏకంగా 17,145 మంది రౌడీలు తమంతట తాముగా కారాగార బాట పట్టారు. అక్కడైతే తాము కనీసం ప్రాణాలతో ఉండే అవకాశం ఉందని అలా చేశారు. దీంతో యూపీలో పరిస్థితులు గణనీయంగా మారాయి. మిగిలిన విషయాల్లో ఎలా ఉన్నా గూండాయిజాన్ని అదుపు చేయడంలో యోగికి నూటికి నూరు మార్కులు ఇవ్వాల్సిందే.

గతంలో ఎన్ కౌంటర్ అంటే పెద్ద చర్చ జరిగేది. నిజంగా జరిగిన ఎన్ కౌంటర్ల విషయంలోనూ పోలీసులు ఇబ్బందులు ఎదుర్కొనేవారు. కానీ ప్రస్తుతం పరిస్థితులు బాగా మారాయి. ప్రజలు సైతం ఇన్ స్టెంట్ న్యాయాన్ని కోరుకుంటున్నారు. కరడుగట్టిన నేరస్తులను ఎన్ కౌంటర్ చేయాల్సిందేనని డిమాండ్ చేస్తున్నారు. అలా చేసిన పోలీసులపై పూలవర్షం కురిపిస్తున్నారు. మొన్న దిశ హత్యాచార కేసులో సీపీ సజ్జనార్ పై ప్రశంసలు కురిపించినట్టే.. తాజాగా దుబేను ఎన్ కౌంటర్ చేసిన పోలీసులను పూలదండలతో ముంచెత్తారు. కరడు గట్టిన నేరస్థుల పట్ల పోలీసులు ఇలా కఠినంగా ఉండాల్సిందే అనే అభిప్రాయాలు సర్వత్రా వ్యక్తమవుతున్నాయి.