మనసున మనసై.. చిరంజీవి – సురేఖ దంపతుల పెళ్లిరోజు నేడు

పెళ్లి.. ఇద్దరు మనుషులను కాదు.. రెండు మనసులను ఒక్కటి చేసేది. వేర్వేరు కుటుంబాల నుంచి వచ్చి ఒక్కటిగా జీవితమంతా ఆనందమయం చేసుకోవాలంటే భార్యభర్తలు ఒకరికొకరు అర్థ చేసుకుని ముందుకెళ్లాలి. అప్పుడే ఆదర్శంగా నిలుస్తారు. మెగాస్టార్ చిరంజీవి – సురేఖ దంపతులు 42 ఏళ్లుగా చేస్తుంది ఇదే. అందుకే చిరంజీవి మాటల్లో ఎప్పుడైనా భార్య ప్రస్తావన వస్తే అగ్రతాంబూలం ఆమెకే ఇస్తారు. చలోక్తులు విసిరినా.. ఆమె ఔన్నత్యం గురించి చెప్పినా చిరంజీవి మోములో ఓ వెలుగు చూడొచ్చు. ఇక భర్త గొప్పదనం గురించి సురేఖ గారి మాటలను కూడా చిరంజీవి మాటల్లోని అంతరార్థం ద్వారా గ్రహించవచ్చు. అన్యోన్య దాంపత్యానికి నిలువెత్తు నిదర్శనంగా ఇంతకంటే ఏం చెప్పగలం. అందుకే మెగాభిమానులకు ఆగస్టు 22 ఎంత పండగో ఫిబ్రవరి 20 కూడా ఒక పండుగ. కారణం.. 42 ఏళ్ల క్రితం అన్నయ్య – వదినమ్మ వివాహ బంధంతో ఒక్కటయింది ఈరోజే కాబట్టి. నేడు చిరంజీవి – సురేఖ దంపతుల పెళ్లిరోజు.

ఒకరికొకరు అర్థం చేసుకుంటూ..

చిరంజీవిది బిజీ షెడ్యుల్. తండ్రి అల్లు రామలింగయ్య నుంచి సినిమా వ్యక్తుల జీవితం ఎంత బిజీగా ఉంటుందో సురేఖ గారికి తెలియంది కాదు. తాను రోజంతా షూటింగ్స్ తో బిజీ అయినా అయిదుగురు తోబుట్టువులు, అత్యంత క్రమశిక్షణ ఉన్న వాతావరణంలో పెరిగిన వ్యక్తిగా కుటుంబాన్ని ఎంత ప్రేమగా చూసుకోవాలో చిరంజీవికీ తెలుసు. అందుకే వీరి దాంపత్యం చిరంజీవి హాస్య చతురతలానే సరదాగా సాగుతోంది. నా కోడలు బంగారం.. అని అంజనాదేవి గారు అన్నా.. మా వదిన మాకు తల్లి అని చిరంజీవి తోబుట్టువులు అన్నా సురేఖగారి ప్రేమ, ఆప్యాయతలు వల్లే. అల్లు వారింటి అల్లుడుగా వెళ్ళడానికి ముందే చిరంజీవి తన స్వభావంతో ఆకట్టుకున్నారు. ఇవే వీరిద్దరి దాంపత్యం ఆదర్శంగా నిలవడానికి కారణమైంది. కుటుంబంపట్ల చిరంజీవి – సురేఖ గారు చూపే ఆప్యాయత ఈరోజుల్లో స్పష్టంగా గమనించవచ్చు. సెలవలు, పండుగలు, పుట్టినరోజులుకి కుటుంబమంతా ఒక్కచోట చేరి అనుబంధాల్ని మరింత బలోపేతం చేసుకోవటం వీరి దాంపత్యంలో కలిసి వేసిన ఒక మంచి అడుగు.

అభిమానులకూ పండుగే..

అందుకే కొణిదెల – అల్లు కుటుంబాలకు చిరంజీవి – సురేఖ దంపతుల పెళ్లిరోజు ఎంత పండగో మెగాభిమానులకు కూడా అంతే. చిరంజీవిని అన్నయ్యా.. అని పిలవడంలో ఎంత ఆర్థ్రత ఉంటుందో.. సురేఖ గారిని వదినమ్మా.. అని పిలవడంలోనూ అంతే ఆర్థ్రత ఉంటుంది. అందుకే అన్నా – వదినకు పెళ్లిరోజు శుభాకాంక్షలు చెప్పడంలో ఫిబ్రవరి 19 అర్థరాత్రి నుంచే ఎదురుచూస్తారు. ఆరోజు రానే వచ్చింది. చిరంజీవి – సురేఖ దంపతుల అన్యోన్య దాంపత్యం మరింత ఆనందమయం కావాలని కోరుకుంటూ వారికి పెళ్లిరోజు శుభాకాంక్షలు తెలియచేస్తోంది ‘ తెలుగు బులెటిన్ ‘.