Vizag Steel Plant: విశాఖ ఉక్కు ప్రైవేటీకరణ పై కేంద్రం యూటర్న్?

Vizag Steel Plant: విశాఖ ఉక్కు ప్రైవేటీకరణ పై కేంద్ర ప్రభుత్వం కీలక వ్యాఖ్యలు చేసింది. ఇప్పటికిప్పుడు విశాఖ స్టీల్ ప్లాంట్ ను ప్రైవేటీకరణ చేసే ఆలోచన లేదని కేంద్ర మంత్రి ఫగ్గన్ సింగ్ స్పష్టం చేశారు. గత కొద్ది రోజులుగా ప్రైవేటీకరణ అంశం పొలిటికల్ టర్న్ తీసుకుంది. ఈ క్రమంలో కేంద్ర మంత్రి చేసిన వ్యాఖ్యలు ప్రాధాన్యం సంతరించుకున్నాయి. విశాఖలో ఏర్పాటు చేసిన రోజ్ గార్ మేళ లో పాల్గొన్న ఆయన స్టీల్ ప్లాంట్ అంశంపై మాట్లాడారు.

‘ ఇప్పటికిప్పుడు విశాఖ ఉక్కు ప్లాంటుని ప్రైవేటీకరణ చేయాలని అనుకోవడం లేదు. ముందుగా రాష్ట్రీయ ఇస్పాత్ నిగం లిమిటెడ్(ఆర్ఐఎన్ఎల్) ను బలోపేతం చేయాలి. స్టీల్ ప్లాంట్ లో కొన్ని కొత్త విభాగాలు ప్రారంభించి ఉత్పాదకత సాధించాలనుకుంటున్నాం. ఈ అంశంపై ఆర్ఐఎన్ఎల్ యాజమాన్యం, కార్మిక సంఘాలతో చర్చించిన తర్వాతే ఏ నిర్ణయమైనా తీసుకోవాలి. కొందరు మా నిర్ణయాన్ని జనాలకు తప్పుగా చూపిస్తున్నారు. తెలంగాణ ప్రభుత్వం జోక్యం కూడా ఓ ఎత్తుగడే. ప్రైవేటీకరణ అంశాన్ని వారు రాజకీయ కోణంలో చూస్తున్నారు’ అని అన్నారు.

నష్టాల్లో ఉన్న ప్రభుత్వ రంగ సంస్థలు అన్నింటిని ప్రైవేటీకరించాలని కేంద్రం నిర్ణయించిన విషయం తెలిసిందే. ఈ నిర్ణయాన్ని బిజెపి పాలిత ప్రాంతాలు తప్ప మిగిలిన రాష్ట్రాలన్నీ వ్యతిరేకిస్తున్నాయి.