ఎడారిలో ఇరుక్కుపోయి.. కారునే బైక్ గా చేసి..

ఏదైనా సమస్య వచ్చినప్పుడు భయపడిపోవడం కాదు.. ఆ సమస్య నుంచి ఎలా బయటపడాలో ఆలోచించడమే వివేకవంతుల లక్షణం. మొరాకోకు చెందిన ఎమిలీ లెరే అలాంటి ధైర్యవంతుడే. తనకు ఎదురైన ఓ సమస్య నుంచి అతడు చాకచక్యంగా బయటపడటమే ఇందుకు నిదర్శనం. 27 ఏళ్ల క్రితం జరిగిన ఈ ఘటన తాజాగా సోషల్ మీడియాలో వైరల్ అయింది. ఆయన గురించి ఓ ఆంగ్ల వెబ్ సైడ్ కథనం ప్రచురించడంతో మనోడి సత్తా ఏంటో తెలుసుకుని నెటిజన్లు ఫిదా అవుతున్నారు.

ఎమిలీకి టూర్లంటే ఇష్టం. ఎప్పుడూ తన కారు వేసుకుని దూరప్రాంతాలకు షికార్లు చేస్తుంటాడు. అలాగే 1993లో ఓసారి మొరాకోలోని ఎడారి ప్రాంతానికి షికారెళ్లాడు. ఎడారిలో కొంత దూరం వెళ్లిన తర్వాత వెళ్లాల్సిన మార్గంలో కాకుండా రాళ్లు ఎక్కువగా ఉన్న మార్గాన్ని ఎంచుకుని ముందుకెళ్లాడు. అయితే, ఆ మార్గం ప్రమాదకరంగా ఉండటంతో అతడి కారు ప్రమాదానికి గురై ఆగిపోయింది. కారు యాక్సిల్ విరిగిపోవడంతో ముందుకెళ్లే పరిస్థితి లేదు. అది నిర్మానుష్య ప్రాంతం కావడంతో ఏం చేయాలో తోచలేదు. ముందుకెళ్లాలన్నా.. వెనక్కి వెళ్లాలన్నా చాలా మైళ్లు ప్రయాణించక తప్పదు. అలాంటి ప్రదేశంలో ఎమిలీ ఇరుక్కుపోయాడు.

ఏం చేయాలా అని ఆలోచించిన అతడికి తన కారునే బైక్ గా మారిస్తే సరిపోతుంది కదా అని ఆలోచన వచ్చింది. ఐడియా అయితే వచ్చింది కానీ అందుకు తగ్గ పరికరాలు ఏమీ లేవు. స్వతహాగా కారు మెకానిక్ కావడంతో ఓ సారి ట్రైచేసి చూద్దామని భావించాడు. కారులో ఉన్న టూల్ కిట్ తోనే పని ప్రారంభించాడు. ముందుగా కేవలం చేతులు ఉపయోగించే కారును ఊడబీకడం ప్రారంభించాడు. అందుకు అతడికి నాలుగు రోజుల సమయం పట్టింది. దగ్గర ఉన్న కొద్దిపాటి ఆహారం, నీళ్లను పొదుపుగా వాడుకుంటూ పనిలో పడిపోయాడు. బైక్ తయారీకి కావాల్సిన విడిభాగాలన్నీ సమకూర్చుకున్నాడు. అయితే వాటిని అసెంబ్లింగ్ చేయాలంటే వెల్డింగ్ మెషీన్ కావాలి. మరి ఎలా? దానికీ ఓ ఉపాయం ఆలోచించాడు.. కారులో ఉన్న వైర్లతో ఒక్కో భాగాన్నీ కట్టడం ప్రారంభించాడు. అలా 12 రోజులు 11 రాత్రులు కష్టపడి బైక్ కు ఓ రూపం తెచ్చాడు.

ఇంధన ట్యాంకును అమర్చి, తన తెలివితేటలతో స్టార్ట్ చేయడంతో విజయం సాధించాడు. అంతే.. అప్పటివరకు ఉన్న కష్టమంతా మాయమైపోయింది. ఎంచక్కా ఆ బైక్ వేసుకుని బతుకుజీవుడా అంటూ ఇంటికి పయనమయ్యాడు. అయితే, హైవే పైకి రాగానే మనోడి వాలకం, బండి చూసిన పోలీసులకు అనుమానం కలిగింది. ఇదేం బండి? పత్రాలు చూపించమని అడిగారు. దీంతో కారు పత్రాలు చూపించాడు. కారు పేపర్లు చూపించి బండి పేపర్లు అంటావ్.. తిక్కతిక్కగా ఉందా? ఫైన్ కట్టు అనేసరికి.. వారు వేసిన జరిమానా చెల్లించి బయటపడ్డాడు.

అప్పట్లో మీడియా ఇంత విస్తృతంగా లేకపోవడంతో ఎమిలీ విషయం అంతగా బయటకు రాలేదు. ఇటీవల అతడిపై ఓ వెబ్ సైట్ లో వార్త రావడంతో పాపులర్ అయ్యాడు. ఎమిలీ ఇంటికి వెళ్లి చూస్తే చిత్ర విచిత్రమైన వాహనాలు చాలా కనిపిస్తాయి. చివరకు అతడు ఉపయోగించు కళ్లజోడు కూడా చిత్రంగా ఉంటుంది. ఇప్పటికే చాలా వాహనాలను చిత్ర విచిత్రంగా మార్చేసిన ఎమిలీకి ఒక్క కల అలాగే మిగిలిపోయిందట. అదే.. ఏదైనా విమానం దొరికితే దానిని కూడా మార్చేయ్యాలి అంటున్నాడు. వామ్మో.. వీడు మామూలోడు కాదుగా!