బీజేపీ దగ్గర రఘురామ పప్పులుడకట్లేదెందుకు.?

అసలేమయ్యింది యువజన శ్రామిక రైతు కాంగ్రెస్ పార్టీ ఎంపీ రఘురామకృష్ణరాజుకి.? ఆయనకు బీజేపీతో సత్సంబంధాలే వున్నాయి కదా.! కేంద్ర ప్రభుత్వ పెద్దలతో అత్యంత సన్నహిత సంబంధాలు కూడా వున్నాయి కదా.? అయినాగానీ, ప్రధాని నరేంద్ర మోడీ వెంట సొంత నియోజకవర్గం నర్సాపురం వెళ్ళలేకపోవడమేంటి.?

ఇప్పటిదాకా రఘురామకృష్ణరాజుని వీరుడిగా, శూరుడిగా కొలిచిన ఆయన అభిమానగణంలోనూ పుట్టుకొస్తున్న ప్రశ్నలివి. రఘురామ సొంత నియోజకవర్గానికి ప్రధాని నరేంద్ర మోడీ వచ్చి వెళ్ళారు. మన్యం వీరుడు అల్లూరి సీతారామారాజు విగ్రహాన్ని ఆవిష్కరించారు. మెగాస్టార్ చిరంజీవి కూడా ఈ కార్యక్రమానికి హాజరయ్యారు. ముఖ్యమంత్రి వైఎస్ జగన్ మోహన్ రెడ్డి సహా, వైసీపీకి చెందిన పలువురు కీలక నేతలు ఈ కార్యక్రమంలో పాల్గొన్నారు.

వైసీపీ నుంచే 2019 ఎన్నికల్లో నర్సాపురం ఎంపీగా గెలిచిన రఘురామ లేకుండానే ఈ కార్యక్రమం జరిగిపోయింది. ప్రోటోకాల్ ప్రకారం స్థానిక ఎంపీ, ప్రధాని పర్యటనలో వుండాలి. కానీ, ఆయన లేకుండా పనైపోయింది. కారణమేంటి.? ‘నన్ను గౌరవించలేదు..’ అంటూ గగ్గోలు పెడుతున్నారు రఘురామకృష్ణరాజు.

ఒకప్పటి రఘురామ వేరు, ఇప్పుడు రఘురామ వేరు. అప్పటి ఆయన హుందాతనం ఇప్పుడు మటుమాయమైపోయింది. ఆయనకు ఢిల్లీలో గౌరవం తగ్గిపోయింది. బీజేపీ అస్సలాయన్ని పట్టించుకోవడంలేదు. లేదంటే, ప్రధాని వెంట ఆయన భీమవరంలో ల్యాండ్ అయ్యేవారే. కేంద్ర మంత్రి కిషన్ రెడ్డి (అల్లూరి విగ్రహావిష్కరణ కార్యక్రమమంతా ఆయన కనుసన్నల్లోనే జరిగింది) అస్సలు పట్టించుకోలేదు తోటి ఎంపీ రఘురామని.

ఇంతటి అవమానభారమా.? అని రఘురామ లోలోపల కుమిలిపోతుండొచ్చు. ఏమో, కేంద్రం వద్ద వైసీపీ పరపతి పెరిగిందేమో. రఘురామపై అనర్హత వేటు కూడా పడుతుందేమో. అదే జరిగితే, రఘురామ జస్ట్ జీరో అయిపోవడం ఖాయం.