బాలకృష్ణ పొలిటికల్‌ ‘యాక్షన్‌’.. అసలు కథ ఇదీ!

సినిమాల్లో నందమూరి బాలకృష్ణ డైలాగులు అదుర్స్‌.. కానీ, అదే బాలకృష్ణ రాజకీయ ప్రసంగాలు చేస్తే మాత్రం అభిమానులు బెదుర్సే. అయితే, ఇది రైట్‌ టైమ్‌.. బాలకృష్ణ తనను తాను మార్చుకోవాల్సిన సందర్భమొచ్చింది. ప్రస్తుతం బాలకృష్ణ హిందూపురం ఎమ్మెల్యేగా ప్రాతినిథ్యం వహిస్తున్నారు. ఎమ్మెల్యేగా రెండోసారి గెలిచిన బాలకృష్ణ, నియోజకవర్గ సమస్యల మీదనే కాదు, రాష్ట్ర ప్రయోజనాల విషయంలోనూ గళం విప్పాల్సిన సందర్భం వచ్చేసింది.

ఆంధ్రప్రదేశ్‌ అసెంబ్లీలో తెలుగుదేశం పార్టీకి కేవలం 23 మంది సభ్యులే వున్న దరిమిలా, అందులో బాలకృష్ణ పాత్ర చాలా కీలకంగా మారింది. ఈ విషయాన్ని చంద్రబాబు గుర్తించారు. బాలకృష్ణకి ప్రత్యేకంగా శిక్షణ కూడా ఇప్పిస్తున్నారట, అసెంబ్లీలో వ్యవహరించాల్సిన తీరు మీద. ప్రతిపక్ష నేతగా చంద్రబాబు అధికార పక్షాన్ని ఎదుర్కోవడం ఎంత అవసరమో, పార్టీలో ప్రతి ఒక్కరూ అదే స్థాయిలో సమర్థత చాటుకోవాల్సి వుంది.

మామూలుగా అయితే, చంద్రబాబు ఎవర్నీ నమ్మరు. కానీ, ఇప్పుడు నమ్మాల్సిందే. సో, ప్రతి ఒక్కర్నీ తన సొంత మనుషుల్లా చూసుకుంటున్న చంద్రబాబు, సొంత మనిషి అయిన బావమరిది బాలకృష్ణ విషయంలో ఇంకా ప్రత్యేక శ్రద్ధ తీసుకుంటున్నారట. తాజాగా, బాలకృష్ణ అసెంబ్లీ సమావేశాల అనంతరం మీడియాతో మాట్లాడుతూ, వైఎస్‌ జగన్‌ ప్రభుత్వంపై మండిపడ్డారు. గవర్నర్‌ ప్రసంగంలో అమరావతి ప్రస్తావన ఎక్కడుందంటూ నిలదీశారు. బాలకృష్ణలోని ఈ ఆవేశం మీడియా ప్రతినిథుల్నీ ఆశ్చర్యపరిచింది.

బాలకృష్ణ రాజకీయాల్లో ముందు ముందు మరింత అగ్రెసివ్‌గా మారితే, తెలుగుదేశం పార్టీ పగ్గాలు ఆయన చేపట్టడానికి పెద్దగా సమయం కూడా పట్టదనీ, అది తెలుగుదేశం పార్టీకి ఎంతో మేలు జరుగుతుందని మీడియా వర్గాలు సైతం చర్చించుకోవడం కనిపించింది. ‘గతంలో మేం అధికార పక్షంలో వున్నాం.. అందుకే, నేను ఎక్కువగా రాజకీయాల్లో కల్పించుకోవడానికి అవకాశం రాలేదు. ఇప్పుడు పార్టీ బాధ్యతల్ని పంచుకోవాల్సిన తరుణం ఆసన్నమైంది. ఇకపై దబిడ దిబిడే’ అని సన్నిహితుల వద్ద బాలకృష్ణ వ్యాఖ్యానించారట.

బాలకృష్ణ రాజకీయాల్లో యాక్టివ్‌ అవుతారని తాము ఊహించలేదనీ, చంద్రబాబు ఆయనకు అవకాశం ఇస్తారంటే ఇప్పటికీ నమ్మలేకపోతున్నామనీ పేరు చెప్పడానికి ఇష్టపడని ఓ వైసీపీ నేత తనకు అత్యంత సన్నిహితుడైన మీడియా ప్రతినిథి ఒకరి వద్ద అభిప్రాయపడ్డారట. ఏదిఏమైనా, నిన్ననే తన కొత్త సినిమాని ప్రారంభించిన బాలకృష్ణ, ఈ రోజు అసెంబ్లీలో అసలు సిసలు రాజకీయం షురూ చేసేశారు. దాంతో నందమూరి అభిమానులు ఫుల్‌ ఖుషీ అవుతున్నారు.