స్కూల్‌లో దాక్కున్న వైసీపీ ఎమ్మెల్యే: శాంతి, భద్రత.! వీళ్ళెక్కడ.?

వైసీపీ ఎమ్మెల్యే స్కూల్‌లో దాక్కున్నారు. ఓ పరామర్శకు వెళితే, గ్రామస్తులు ఆయన్ని తరిమికొట్టారు. ఏలూరు జిల్లాలో జరిగింది ఘటన. సదరు ఎమ్మెల్యే పేరు తలారి వెంకట్రావు. ఆయన అనుచరుడు హత్యకు గురయ్యారు. హత్య చేసింది కూడా తలారి వెంకట్రావేనన్నది బాధిత కుటుంబంతోపాటు వైసీపీ శ్రేణులు చేస్తున్న ఆరోపణ.

‘గ్రామంలో వర్గాల్ని పెంచి పోషించారు.. ఒకరి మీదకు ఇంకొకర్ని ఉసిగొల్పారు.. ఈ హత్యకు కారణం మీరే..’ అంటూ గ్రామస్థులు ఏకమై, ఎమ్మెల్యేను నిలదీశారు. బాధిత వర్గం, ఎమ్మెల్యే మీద దాడికి దిగింది. దాంతో బతుకు జీవుడా.. అంటూ ఎమ్మెల్యే పారిపోవాల్సి వచ్చింది. ప్రస్తుతం ఓ స్కూల్‌లో ఆయన దాక్కున్నారు. అదనపు భద్రతా బలగాలు ఆయన్ని కాపాడి తీసుకొచ్చేందుకు ప్రయత్నిస్తున్నాయట.

వావ్.! ఆంధ్రప్రదేశ్ రాష్ట్రంలో శాంతి, భద్రత.. అదుర్స్ కదూ.! వాళ్ళెవరు.? అనడక్కండి.. ఇది శాంతి భద్రతల వ్యవహారం. హోం శాఖ మంత్రి ఏం చేస్తున్నారని అడక్కండి.. ఇప్పుడామె, శాఖా పరమైన వివరాల గురించి పరిశోధన చేయాల్సి వస్తుంది.

‘సరదాగా, బాధితుడు తన పీక తానే కోసేసుకున్నాడు.. ఎమ్మెల్యే దాగుడు మూతలాడారు.. ఇందులో పెద్ద విషయమేమీ లేదు..’ అంటూ బులుగు రాజ్యాంగం ప్రకారం ఓ కట్టు కథ తెరపైకి వచ్చే అవకాశమూ లేకపోలేదు. ఎందుకంటే, ఏపీలో ఎక్కడ ఏ ఘటన జరిగినా.. దానికి తనదైన స్టయిల్లో బులుగు కవరింగ్ ఇవ్వడం వైసీపీ నేతలకే సాధ్యం. అధికారులూ అదే పంథాలో వ్యవహరిస్తున్నారాయె.

ఓ ఎమ్మెల్యే.. హత్య జరిగాక బాధిత కుటుంబాన్ని పరామర్శించేందుకు వెళితే, పోలీసులు ఆయనకు రక్షణ ఇవ్వలేకపోవడమా.? ఎమ్మెల్యే అనుచరులేమయ్యారు.? ఓ ఎమ్మెల్యేకి రక్షణ లేని పరిస్థితి వుందంటే.. దీన్ని ఎలా అర్థం చేసుకోవాలి.?

వ్యవస్థలెలా నిర్వీర్యమైపోయాయో చెప్పడానికి, హత్య కేసులో బాధిత కుటుంబాన్ని పరామర్శించేందుకు వెళ్ళిన ఎమ్మెల్యే, ప్రాణ భయంతో స్కూళ్ళో దాక్కోవడమే నిదర్శనం.