ముఖ్యమంత్రి కార్యాలయం రాజకీయ విమర్శలు చేయొచ్చా.?

ముఖ్యమంత్రి కార్యాలయానికీ అధికారిక ట్విట్టర్ హ్యాండిల్ వుంది. అది వెరిఫైడ్ కూడా.! ఆ హ్యాండిల్ నుంచి వచ్చిన ఓ ట్వీట్ ఇప్పుడు వివాదాస్పదమవుతోంది.

‘ఇది నలుగురు ధనికుల కోసం, రెండు పత్రికలు, మూడు ఛానెళ్ళు, ఒక దత్త పుత్రుడు నిలువు దోపిడీ కోసం నడిచిన ప్రభుత్వం కాదని జ్ఞాపకం పెట్టుకోండి. ఇది ఒకటిన్నర కోట్ల కుటుంబాలకు ఇంటింటికీ మంచి చేస్తున్న మనందరి ప్రభుత్వమన్నది ఎల్లప్పుడూ గుర్తు పెట్టుకోండి..’ అన్నది ఆ ట్వీటు.

ఇది నలుగురు ధనికుల కోసం, రెండు పత్రికలు, మూడు ఛానెళ్లు, ఒక దత్తపుత్రుడు నిలువు దోపిడి కోసం నడిచిన ప్రభుత్వం కాదని జ్ఞాపకం పెట్టుకొండి. ఇది ఒకటిన్న కోట్ల కుటుంబాలకు ఇంటింటికీ మంచి చేస్తున్న మనందరి ప్రభుత్వమన్నది ఎల్లప్పుడూ గుర్తుపెట్టుకోండి. pic.twitter.com/mmMfKS2o0X

— CMO Andhra Pradesh (@AndhraPradeshCM) July 15, 2022

వైసీపీ కార్యాలయం తాలూకు సోషల్ మీడియా హ్యాండిల్ నుంచి ఇలాంటి ట్వీట్ వస్తే, దాన్ని తప్పు పట్టాల్సిన పనిలేదు. రాజకీయ నాయకులు, రాజకీయ పార్టీలు చేసేది రాజకీయమే. పోనీ, వైసీపీ అనుకూల మీడియా నుంచి ఇలాంటి ట్వీట్ వచ్చినా, దాన్నీ తప్పు పట్టాల్సిన పనేలేదు.

కానీ, ఆంధ్రప్రదేశ్ ముఖ్యమంత్రి కార్యాలయం.. అని ట్విట్టర్ హ్యాండిల్ నడుపుతూ, రాజకీయ పరమైన ట్వీట్ ఏంటన్నది సామాన్యుల నుంచి దూసుకొస్తున్న ప్రశ్న. ఇదే ట్విట్టర్ హ్యాండిల్‌ని ట్యాగ్ చేస్తూ, నెటిజన్లు ప్రశ్నాస్త్రాలు సంధిస్తున్నారు.

‘అది ముఖ్యమంత్రి కార్యాలయం మహాప్రభో.. వైసీపీ కార్యాలయం అనుకునేరు.. ఈ హ్యాండిల్ నడుపుతున్నది ప్రభుత్వమా.? వైసీపీనా.?’ అన్నది నెటిజన్లు సంధిస్తున్న ప్రశ్న.

ముఖ్యమంత్రి వైఎస్ జగన్, ‘వాహనమిత్ర’ పథకం ద్వారా నాలుగో విడుత సొమ్ముల్ని, లబ్దిదారులకు అందజేశారు. అదీ అసలు వార్త. ఈ క్రమంలో ముఖ్యమంత్రి, అధికారిక వేదిక మీద నుంచే రాజకీయ విమర్శలు చేయడం జరిగింది. ఇదెంతవరకు నైతికత.? అంటే, ప్రభుత్వం మంచి చేస్తున్నా విపక్షాలు విమర్శిస్తే, ముఖ్యమంత్రిలోని రాజకీయ నాయకుడు, తన ప్రత్యర్థులపైకి ఘాటైన విమర్శలు చేయడానికి ఆ వేదికను ఉపయోగించుకున్నారనుకోవచ్చు.

అయినాగానీ, ముఖ్యమంత్రి కార్యాలయం ట్విట్టర్ ఇలాంటి ట్వీటుని ఎలా పోస్ట్ చేసిందబ్బా.? అని రాజకీయ విశ్లేషకులు సైతం ముక్కున వేలేసుకుంటున్నారు.