జిల్లాకో రాజధాని: ఏపీ బీజేపీ చీఫ్‌ సోము వీర్రాజు ‘సంచలనం’

ఆంధ్రప్రదేశ్‌కి ఏంటీ ఖర్మ.? దేశంలో ఏ రాష్ట్రానికీ లేని దుస్థితి ఆంధ్రప్రదేశ్‌కి మాత్రమే ఎందుకు.? రాజధాని లేకుండా 13 జిల్లాల ఆంధ్రప్రదేశ్‌ ఏర్పాటవడమేంటి.? ఆ తర్వాత ‘తాత్కాలిక’ నిర్మాణాలతో అమరావతి రాజధాని అవడమేంటి.? ఇప్పుడేమో, ఒక్కటి కాదు.. మూడు రాజధానులంటూ వింత ఆలోచన పాలకుల నుంచి తెరపైకి రావడమేంటి.? అబ్బే, ఇవన్నీ కాదు.. జిల్లాకో రాజదానిని ఏర్పాటు చేసేస్తామంటూ ఆంధ్రప్రదేశ్‌ బీజేపీ తాజా అధ్యక్షుడు సోము వీర్రాజు సంచలన ప్రకటన చేయడమేంటి.?

‘మీకు చేతకావట్లేదు.. మీరు అధికారంలోంచి తప్పుకుని, మాకు అధికారమిస్తే.. ఆరు నెలల్లోనే సమస్యను పరిష్కరిస్తాం. జిల్లాకి ఓ రాజధాని చొప్పున రాష్ట్రానికి 13 రాజధానులు చేసేస్తాం..’ అంటూ ఆవేశంతో సోము వీర్రాజు ఓ ఛానల్‌ ఇంటర్వ్యూలో నినదించేస్తోంటే, చూసేవాళ్ళకి మైండ్‌ బ్లాంక్‌ అయిపోయింది.

ఒకప్పటి ఆంధ్ర రాష్ట్రానికి కర్నూలు రాజధాని. ఆ తర్వాత ఆంధ్రప్రదేశ్‌గా మారాక హైద్రాబాద్‌ రాజధాని. ఆ తర్వాత 13 జిల్లాల ఆంధ్రప్రదేశ్‌కి అమరావతి రాజధాని అయ్యింది. ఇప్పుడేమో, మూడు రాజధానుల పేరుతో.. అసలు రాజధాని ఏదో అర్థం కాని పరిస్థితి ఆంధ్రప్రదేశ్‌ది. రాజకీయ పార్టీలన్నీ ఆంధ్రప్రదేశ్‌తో ఎంతలా ఆడేసుకుంటున్నాయో చెప్పడానికి ఇంతకన్నా నిదర్శనం ఇంకేం కావాలి.?

‘వైసీపీకి వచ్చిన 151 సీట్లల్లో 40 మావే.. వాటిల్లోంచి కొన్ని లాగేసుకుంటాం.. టీడీపీ నుంచి కూడా కొన్ని లాగేసుకుంటాం.. 2024 ఎన్నికల్లో 32 సీట్లు గెలుస్తాం.. ఏ పార్టీకీ మెజార్టీ రాదు.. అప్పుడు చక్రం తిప్పి మేమే అధికారంలోకి వస్తాం..’ ఇదీ సోము వీర్రాజు ఓ ఇంటర్వ్యూలో చెప్పిన లెక్క. వింటే ఎవరికైనా మైండ్‌ బ్లాంక్‌ అయిపోవాల్సిందే. పైగా, టీడీపీ ఓ కన్ను అట.. వైసీపీ ఇంకో కన్ను అట.. రెండిటీని ఓ చూపు చూస్తారట. ఇంతకీ, ప్రస్తుత మిత్రపక్షం జనసేన పార్టీ పరిస్థితి ఏంటట.?

బీజేపీలో వున్న ఒకప్పటి టీడీపీ నేత దినకర్‌, హైకోర్టులో రాజధానిపై రిట్‌ పిటిషన్‌ వేశారు కదా.. అమరావతిపై సుజనా చౌదరి, పార్టీ లైన్‌కి భిన్నంగా మాట్లాడుతున్నారు కదా.? అని ప్రశ్నిస్తే, ‘నేను అధ్యక్షుడినయ్యాను కదా.. ఆ కర్‌.. ఈ కర్‌.. ఎవరి ఆటలూ చెల్లవు..’ అంటూ చిత్ర విచిత్రమైన వ్యాఖ్యలు చేశారు సోము వీర్రాజు. ఇన్ని కబుర్లు చెప్పారుగానీ, అమరావతి విషయంలో మాత్రం బీజేపీ వైఖరిని సోము వీర్రాజు స్పష్టం చేయలేదు.

సోము వీర్రాజు కంటే కన్నా లక్ష్మినారాయణ కాస్తో కూస్తో బెటర్‌.. కన్నా లక్ష్మినారాయనతో పోల్చితే అంతకు ముందు బీజేపీ అధ్యక్షుడిగా వున్న హరిబాబు చాలా చాలా బెటర్‌. ఇంత కన్‌ఫ్యూజన్‌లో వున్న బీజేపీ, ఆంధ్రప్రదేశ్‌లో అధికారం మీద ఆశలు పెట్టుకోవడాన్ని ఏమనుకోవాలి.? ఎలా అర్థం చేసుకోవాలి.?

అదే విధంగా బీజేపీ నేతలు చేసే ఇటువంటి అర్థంపర్థం లేని మాటల వల్ల కేవలం ఆ పార్టీకే నష్టం చేకూర్చడం గాక అటు మిత్రపక్షమైన జనసేన కూడా ఆ పర్యవసనాలు అనుభవించాల్సి ఉంటుందని జనసేన అభిమానులు వాపోతున్నారు.